तळेगाव दाभाडे, ता. १७ ः राज्य शासनाच्या नगरविकास विभागाने नगरपरिषदेच्या आगामी निवडणुकीचा कालबद्ध कार्यक्रम जाहीर केला आहे. त्यानुसार तळेगाव दाभाडे नगरपरिषद क्षेत्रातील प्रारूप प्रभाग रचना प्रसिद्ध करण्यात आली आहे. यावर नागरिकांना ३१ ऑगस्टपर्यंत हरकती व सूचना नोंदविता येतील.
नगरपरिषद स्तरावर स्थापन झालेल्या प्रभाग रचना समितीने विहित कालमर्यादेत प्रारूप प्रभाग रचना तयार केली. पुण्याच्या जिल्हाधिकाऱ्यांमार्फत नगरविकास मंत्रालयाकडे ती सादर करण्यात आली. या प्रस्तावास मान्यता देण्याचे अधिकार राज्य निवडणूक आयोगाच्या आदेशानुसार विभागीय आयुक्तांना प्रदान करण्यात आले आहेत. त्यानुसार पुणे विभागाचे विभागीय आयुक्त चंद्रकांत पुलकुंडवार यांनी १३ ऑगस्ट रोजी मान्यता दिली.
नियोजित वेळापत्रकानुसार १८ ते ३१ ऑगस्ट दरम्यान प्रारूप प्रभाग रचना प्रसिद्ध करण्यात येत आहे. याचा तपशील सर्वसामान्य नागरिकांसाठी नगरपरिषद कार्यालयातील नोटीस बोर्ड तसेच नगरपरिषदेच्या अधिकृत संकेतस्थळावर उपलब्ध राहणार आहे.
इच्छुक नागरिकांनी हरकती व सूचना लेखी स्वरूपात नगरपरिषदेच्या कार्यालयातील आवक-जावक विभागात सादर कराव्यात. त्यांना सुनावणीची स्वतंत्रपणे वेळ देण्यात येईल. मुदतीनंतर प्राप्त होणाऱ्या हरकती व सूचनांचा विचार केला जाणार नाही, असे नगरपरिषद प्रशासनाने स्पष्ट केले आहे.
नगरपरिषदेच्या निवडणुकीसाठी प्रभाग रचना महत्त्वाचा टप्पा असतो. प्रभागनिहाय मतदारसंख्या, भूगोल व लोकसंख्येच्या आधारे ही रचना करण्यात आली आहे. नागरिकांनी सक्रिय सहभाग नोंदवून योग्य त्या हरकती व सूचना सादर कराव्यात, असे आवाहन नगरपरिषदेचे मुख्याधिकारी विजयकुमार सरनाईक यांनी केले.
---