तळेगाव दाभाडे : ‘‘कान्हेफाटा ते सावळा गाव हद्दीत सुरू असलेले रस्ता रुंदीकरण बेकायदेशीर आहे. ते तत्काळ थांबवावे, अन्यथा तीव्र आंदोलन करण्यात येईल,’’ असा इशारा रयत प्रहार संघटनेने दिला आहे. याबाबत संघटनेने वडगाव तहसीलदार यांना निवेदन दिले आहे. संबंधित रस्ता पूर्वी १५ फूट रुंदीचा होता. सध्या त्याचे रुंदीकरण केले जात आहे. मात्र, या कामासाठी शेतकऱ्यांच्या जमिनींची मोजणी करण्यात आलेली नाही. जमीन संपादनासंदर्भातील आवश्यक कायदेशीर प्रक्रिया, नोटीस देणे, हरकती न मागवता थेट काम सुरू करण्यात आल्याचा गंभीर आरोप संघटनेने केला आहे. निवेदनावर संघटनेचे संस्थापक अध्यक्ष भारत मोरे, कृती समिती अध्यक्ष गुलाब शंकर तिकोणे, तालुका अध्यक्ष संतोष ढवळी व कार्याध्यक्ष सोनू खाडे यांच्या स्वाक्षऱ्या आहेत.