तळेगाव दाभाडे, ता. २३ : रोटरी क्लब ऑफ तळेगाव दाभाडे सिटी व आमदार सुनील शेळके फाउंडेशन यांच्या वतीने सामुदायिक विवाह सोहळ्याचे आयोजन करण्यात आले आहे. हा सोहळा रविवारी, ३ मे २०२६ रोजी सायंकाळी ६ वाजता मारुती मंदिर चौकाजवळील थोर समाजसेवक नथुभाऊ भेगडे-पाटील प्राथमिक शाळा येथे पार पडणार आहे.
गरजू कुटुंबांतील वधू-वरांना सन्मानाने विवाहबद्ध होण्याची संधी मिळावी, या उद्देशाने हा उपक्रम राबविण्यात येत आहे. सहभागी होणाऱ्या जोडप्यांची पारंपरिक पद्धतीने भव्य मिरवणूक काढण्यात येणार असून, ढोल-ताशांच्या गजरात व पारंपरिक वेशभूषेत हा सोहळा उत्साहात साजरा केला जाणार आहे.
विवाह सोहळ्यानंतर सर्वांना सुरळीत व समाधानकारक भोजन मिळावे यासाठी स्वतंत्र व्यवस्था उभारण्यात येणार असल्याची माहिती आयोजकांनी दिली. याशिवाय, वधू-वरांना संसारोपयोगी भांड्यांचा संच, गॅस सिलिंडर व रेशनिंगसह आवश्यक साहित्य देण्यात येणार आहे. विवाह प्रमाणपत्राची सोय करण्यात आली असून, काही वधूंना प्रोत्साहनपर मोबाईल फोनही देण्यात येणार आहेत. या सामुदायिक विवाह सोहळ्यासाठी इच्छुकांनी १५ एप्रिलपर्यंत नोंदणी करावी, असे आवाहन आयोजकांनी केले आहे. अधिक माहितीसाठी नारायणराव काळोखे नागरी पतसंस्था, समर्थ चौक, तळेगाव दाभाडे स्टेशन परिसर येथे संपर्क साधावा, असेही सांगण्यात आले.
---