तळेगाव दाभाडे, ता. २४ : शासनाच्या कृषी विभागाचा १७ वर्षांनंतर जाहीर झालेला नवा आकृतिबंध क्षेत्रीय अधिकाऱ्यांच्या अपेक्षांवर पाणी फेरणारा असल्याचा आरोप करत कृषी अधिकारी व कर्मचाऱ्यांनी आंदोलन सुरू केले. क्षेत्रीय स्तरावर प्रत्यक्ष शेतकऱ्यांसाठी काम करणाऱ्या अधिकाऱ्यांच्या पदनाम आणि वेतनश्रेणीत अपेक्षित सुधारणा न झाल्याने तीव्र असंतोष निर्माण झाला आहे.
महाराष्ट्र राज्य कृषीसेवा महासंघ व सर्व तांत्रिक संघटनांनी राज्यभर आंदोलनाची हाक दिली. पहिल्या टप्प्यात २४ व २५ ऑगस्ट रोजी काळ्या फिती लावून निषेध केला जात आहे.
संघटनांच्या म्हणण्यानुसार, आस्थापना शाखेतील कनिष्ठ लिपिक, वरिष्ठ लिपिक, सहाय्यक अधीक्षक आदी पदांमध्ये बदल करून नवीन पदांची निर्मिती व वेतनश्रेणीत वाढ करण्यात आली आहे. मात्र, शेतकऱ्यांच्या बांधावर जाऊन प्रत्यक्ष काम करणाऱ्या क्षेत्रीय अधिकाऱ्यांच्या पदांना व वेतनश्रेणीला न्याय देण्यात आलेला नाही.
पुढील टप्प्यात २७ ऑगस्ट रोजी व्हॉट्सॲप ग्रुपमधून बाहेर पडणे, २८ ऑगस्ट रोजी रात्री उशिरापर्यंत काम करणे, ३१ ऑगस्ट व १ सप्टेंबर रोजी लेखणी बंद आंदोलन करून अहवाल सादरीकरण व बैठकांवर बहिष्कार टाकण्यात येईल. २ व ३ सप्टेंबर रोजी सामूहिक रजा घेऊन जिल्हा व आयुक्तालय स्तरावर ठिय्या आंदोलन करण्यात येईल.
दरम्यान, चार सप्टेंबरपर्यंत मागण्या मान्य न झाल्यास बेमुदत कामबंद आंदोलन करण्याचा इशारा कृषी सेवा महासंघ व तांत्रिक संघटनांनी दिला आहे. कृषीमंत्री व कृषी आयुक्तांना याबाबत निवेदन देण्यात आले.