तळेगाव स्टेशन, ता. २२ : रमजान ईद सण तळेगाव दाभाडे व परिसरात मुस्लिम बांधवांच्या वतीने उत्साहात साजरा करण्यात आला. तळेगाव स्टेशनच्या नूर मशिदीत मौलाना शाहीद सिकिलकर यांच्या मार्गदर्शनाखाली शनिवारी सकाळी सामूहिक नमाज पठण करण्यात आले. पवित्र रमजान महिन्याचे महत्त्व सांगत सामाजिक सलोखा आणि ईश्वराप्रती निष्ठा राखत, समाजातील गरजूंना उदारमनाने जकातरुपी दान देण्याचे आवाहन मौलाना शाहीद यांनी उपस्थित समाजबांधवांना केले. नमाज पठण करण्यास आलेल्या समाज बांधवांनी रमजान ईदनिमित्ताने एकमेकांना आलिंगन देत ईदच्या शुभेच्छा दिल्या. नूर मशिदीचे विश्वस्त आयुब सिकीलकर, बाबा मुलाणी, जमीर नालबंद, औरंग सादुले, नदीम शेख, इरफान आत्तार आदींनी नियोजन केले.