तळेगाव स्टेशन, ता. १२ : जनसेवा विकास समितीचे प्रवर्तक किशोर आवारे यांच्या प्रथम स्मृतिदिनामित्त रविवारी (ता. १२) चाकण रस्त्यावरील मराठा क्रांती चौकात आयोजित मुख्य श्रद्धांजली सभेमध्ये सामाजिक, राजकीय क्षेत्रातील विविध मान्यवरांनी प्रतिमेस पुष्पहार अर्पण करुन श्रद्धांजली वाहिली.
किशोरभाऊ आवारे मित्र परिवाराच्यावतीने या सभेचे आयोजन केले होते. माजी राज्यमंत्री संजय भेगडे, उद्योजक रामदास काकडे, सत्यशीलराजे दाभाडे, भाजप किसान मोर्चाचे प्रदेशाध्यक्ष गणेश भेगडे, भाजपचे तालुकाध्यक्ष रवींद्र भेगडे, दलित कोब्रा संघटनेचे प्रमुख अँड. भाई विवेक चव्हाण, माजी नगरसेवक निखिल भगत, संतोष शिंदे, रोहीत लांघे, कल्पेश भगत, योगेश पारगे, नलेश पारगे, आशिष खांडगे यांच्यासह दिवंगत किशोर आवारे यांचे चाहते, स्त्री शक्ती भाजी मंडईमधील भाजी विक्रेत्या महिला, कामगार आणि नागरीक मोठ्या संख्येने उपस्थित होते.
उद्योजक काकडे म्हणाले, ‘‘किशोर आवारे यांनी आपल्या वडिलांचा कामगारहिताचा वारसा पुढे चालवला. भारताची संरक्षण निती आणि व्यवस्था कशी असावी, याबाबत सखोल अभ्यास असल्याने भारताचे राष्ट्रीय सुरक्षा सल्लागार अजित डोवाल यांच्याशी खूप जवळचे संबंध होते. मात्र, या माणसाची उंची नेमकी जवळच्या माणसांनाच समजली नाही, याचा खेद वाटतो. स्वतःचे घर पाडून मंदिर बांधणारा किशोर आवारे हा एकमेव माणूस होता. त्यांचा सर्वसामान्य, गोरगरिब, दीनदुबळ्यांना मोठा आधार होता.’’
संजय भेगडे म्हणाले, ‘‘किशोर आवारे यांचे समाजसेवेचे काम पुढे चालविणे हीच खरी आदरांजली ठरेल.’’
माजी उपनगराध्यक्ष गणेश काकडे, सत्यशीलराजे दाभाडे यांनी आवारे यांच्यासोबतच्या आठवणी जाग्या केल्या. माजी नगरसेवक सुनील करंडे, जमीन हक्क संघटनेच्या करुणा सरोदे, सामाजिक कार्यकर्ते दिलीप डोळस, जनहित सामाजिक चॅरिटेबल ट्रस्टचे सचिन कांबळे, अनिल धर्माधिकारी आदींनी आवारे यांचे सामाजिक कार्य आणि आठवणींना उजाळा देत श्रद्धांजली वाहिली.
कल्पेश भगत यांनी प्रास्तविक आणि सूत्रसंचालन केले. मिलिंद अच्यूत, नीलेश जाचक आणि सहकाऱ्यांनी नियोजन केले. सोमाटणे फाटा येथील एमराल्ड हॉटेलमध्ये सकाळी रक्तदान शिबिराचे आयोजन करण्यात आले होते.

फोटोः 05019