गणेश बोरुडे : सकाळ वृत्तसेवा
तळेगाव स्टेशन, ता. १० : तळेगाव-चाकण-शिक्रापूर राष्ट्रीय महामार्ग क्रमांक ५४८-डी यातील तळेगाव ते चाकण हा २५ कि.मी. चौपदरी उन्नत रस्ता प्रस्तावित आहे. या प्रकल्पासाठी साडेसहा हजार कोटी रुपये खर्च अपेक्षित असल्याचा उल्लेख अर्थमंत्री अजित पवार यांनी सोमवारी (ता.१०) अर्थसंकल्पावेळी केला. त्यामुळे या मार्गाचे काम सुरू होण्याचे संकेत मिळाले आहेत.

अर्थमंत्री पवार यांनी पुणे ते शिरूर आणि तळेगाव-चाकण-शिक्रापूर या राज्य सरकारकडून प्रस्तवित असलेल्या महत्त्वाच्या दोन रस्त्यांबाबत माहिती दिली. यात पुणे ते शिरूर या ५४ कि.मी.रस्त्यासाठी सुमारे साडेसात हजार कोटी रुपये किंमतीच्या उन्नत मार्गाचे बांधकामाचा उल्लेखही करण्यात आला आहे.
सात वर्षांपूर्वी घोषणा होऊनही तळेगाव-चाकण-शिक्रापूर रस्त्याचे काम गेली कित्येक वर्षे प्रलंबितच राहिले. त्यानंतर गेल्या वर्षी केंद्रीय रस्ते विकास मंत्रालयाने हा रस्ता राज्य सरकारकडे हस्तांतरित केला. आता महाराष्ट्र राज्य पायाभूत सुविधा महामंडळ अर्थात ‘एमएसआयडीसी’च्या माध्यमातून ‘बीओटी’ तत्वावर या रस्त्याचे काम होणार आहे.
तळेगाव-चाकण रस्त्याचा सविस्तर प्रकल्प अहवाल (डीपीआर) पूर्ण झाला असला, तरी मसुदा मंत्रिमंडळाच्या मंजुरीसाठी प्रलंबित आहे. भूसंपादनासाठी जवळपास ४१० कोटी रुपये अपेक्षित असून, गेल्या फेब्रुवारीत त्याचा मसुदा अर्थ खात्याकडे प्रलंबित आहे. नियोजन विभागाच्या मंजुरीनंतर हा प्रस्ताव अर्थमंत्र्यांच्या स्वाक्षरीसाठी कॅबिनेटमध्ये ठेवला जाणार आहे.

पाच वर्षांपासून पाठपुरावा
तळेगाव-चाकण-शिक्रापूर या ५६ किलोमीटर अंतराच्या प्रलंबित महामार्गाच्या कामासाठी तळेगाव-चाकण-महामार्ग कृती समिती गेल्या पाच वर्षांपासून सातत्याने पाठपुरावा करत आहे. समितीने मावळचे आमदार सुनील शेळके आणि खेडचे आमदार बाबाजी काळे यांना सोबत घेत महाराष्ट्र राज्य पायाभूत सुविधा महामंडळाचे (एमएसआयडीसी) व्यवस्थापकीय संचालक ब्रिजेश दीक्षित यांची भेट घेत पाठपुरावा केला. तसेच प्रकल्पाच्या कॅबिनेट मंजुरीसाठी उपमुख्यमंत्री अजित पवार यांनाही निवेदन दिले. या पार्श्वभूमीवर या कामाचा अर्थसंकल्पात समावेश झाल्याने पाठपुराव्याला न्याय मिळाल्याची भावना कृती समितीने व्यक्त केली.

तळेगाव-चाकण रस्त्याचे काम अर्थसंकल्पात समाविष्ट झाल्याने पाठपुराव्याला अंशतः न्याय मिळाला, असे म्हणावे लागेल. आता मसुद्याची कार्यालयीन प्रक्रिया युद्धपातळीवर पूर्ण करुन मंत्रिमंडळ बैठकीत त्याला मंजुरी मिळावी आणि उर्वरित प्रक्रिया पूर्ण वेळेत व्हावी.
- अमित प्रभावळकर, सचिव, तळेगाव-चाकण-शिक्रापूर महामार्ग कृती समिती

फोटो ओळी : एनएच-५४८ डी लोगो