तळेगाव स्टेशन, ता. ११ : रोटरी क्लबचे प्रांतपाल संतोष मराठे यांच्या उपस्थितीत पार पडलेल्या ३३व्या पदग्रहण समारंभात रोटरी क्लब ऑफ तळेगाव दाभाडेचे २०२५-२६ या वर्षासाठी नवनिर्वाचित अध्यक्ष श्रीशैल मेंथे, उपाध्यक्ष प्रमोद दाभाडे तर सचिव म्हणून प्रसाद मुंगी यांच्यासह १७ कार्यकारी सदस्यांनी पदभार स्वीकारला. आगामी कार्यकाळात आरोग्य शिबिर, गाव दत्तक योजना, गर्भाशयाच्या कर्करोग तपासणी आदी विविध प्रकल्प पूर्णत्वास नेणार असल्याची ग्वाही नवनिर्वाचित अध्यक्ष मेंथे यांनी दिली. मावळते अध्यक्ष कमलेश कार्ले यांनी नूतन कार्यकारिणीला शुभेच्छा दिल्या. कल्याणी मुंगी आणि सहकाऱ्यांनी संपादित केलेल्या नियतकालिकाचे यावेळी प्रकाशन करण्यात आले. क्लबच्या ३२ वर्षांच्या कालखंडातील सक्रिय माजी अध्यक्षांचा सत्कार करण्यात आला. सहाय्यक प्रांतपाल विन्सेंट सालेर, जिल्हा सदस्यत्व संचालक विवेक दीक्षित, उद्धव चितळे, गिरीश जोशी, अर्चना चितळे आदींसह रोटरी क्लब सदस्य मोठ्या संख्येने उपस्थित होते. नीलिमा बारटक्के व राजेंद्र पोळ यांनी सूत्रसंचालन केले. उपाध्यक्ष प्रमोद दाभाडे यांनी आभार प्रदर्शन केले.