वडगाव मावळ, ता. २ : सततच्या पावसामुळे मावळ तालुक्यात संपूर्ण क्षेत्रावर भाताचा नापेरा होण्याची भीती व्यक्त होत आहे. त्यामुळे शासकीय यंत्रणेमार्फत पंचनामे करून शेतकऱ्यांना नुकसान भरपाई मिळवून द्यावी, अशी मागणी पुणे जिल्हा किसान युनियनचे अध्यक्ष माऊली दाभाडे यांनी केली आहे.

किसान युनियनच्या वतीने याबाबत जिल्हाधिकारी जितेंद्र डुडी यांना निवेदन देण्यात आले आहे. मावळ तालुका हा खरीप भात पीकाचा म्हणून शासन दप्तरी नोंद आहे. भौगोलिक परिस्थिती आणि आतिवृष्टीमुळे कोरडवाहू भात हे एकच मुख्य पीक मावळ तालुक्यातील शेतकरी घेत असतो. यंदा ६ मे रोजी पाऊस सुरू झाल्यापासून आजपर्यंत तो थांबलेला नाही. पावसात दोनदा भाताचे बी टाकूनही वापसा नसल्यामुळे व अति पावसामुळे भाताच्या रोपांची उगवण झालेली नाही. त्यामुळे संपूर्ण भात क्षेत्रात म्हणजेच मावळ तालुक्यात सुमारे १३ हजार हेक्टरमध्ये नापेरा होण्याची दाट शक्यता आहे. कृषी व महसूल या शासकीय यंत्रणांकडून पंचनामे करून त्याबाबतचा अहवाल प्राप्त करून राज्य शासनाला सादर करावा. मावळासह भोर, वेल्हा, मुळशी, खेड, आंबेगाव, जुन्नर या खरीप व कोरडवाहू शेतकऱ्यांना शासनाकडून भरपाई मिळण्याबाबत योग्य तो अहवाल सादर करावा, अशी मागणी या निवेदनात केली आहे.