वडगाव मावळ, ता. १७ : येथील श्री दत्त मंदिरासमोर पार्क केलेल्या एका मोटारगाडीची काच फोडून अज्ञात चोरट्याने आतील रोख रक्कम व मोबाईल असा सुमारे सव्वा लाख रुपयांचा ऐवज चोरून नेला. ही घटना बुधवारी दुपारी सव्वा तीन ते पावणे पाच या कालावधीत घडली.
सूरज बाळू ठाकर (वय २२, रा. माळेगाव बु, ता. मावळ) यांनी या प्रकरणी वडगाव पोलिस ठाण्यात फिर्याद दिली आहे. पोलिस निरीक्षक कुमार कदम यांनी दिलेल्या माहितीनुसार, सूरज ठाकर यांनी बुधवारी दुपारी त्यांची मोटार वडगाव बाजारपेठेतील दत्त मंदिरासमोर पार्क केली होती. अज्ञात चोरट्याने त्यांच्या गाडीची ड्रायव्हर बाजूकडील मागील काच फोडली व मागील सीटवर ठेवलेल्या कापडी पिशवीतील एक लाख वीस हजार रुपये रोख, पाच हजार रुपये किमतीचा मोबाईल व कागदपत्रे चोरून नेली. पोलिस हवालदार आशिष काळे पुढील तपास करीत आहेत.