वडगाव मावळ, ता. १८ : वडगाव बाजारपेठेत गहाळ झालेली अडीच तोळ्यांची सोनसाखळी पोलिसांनी शोधून दिली.
परमेश्वर पवार (वय ३५ वर्ष, रा. पौड) हे वडगाव येथे नातेवाइकांकडे आले होते. त्यांच्या पत्नीच्या गळ्यातील सोनसाखळी ग्रामदैवत श्री पोटोबा महाराज मंदिर परिसरात पडली. ही बाब त्यांना अर्धा तासाने लक्षात आली. त्यांनी परत येऊन पाहिले असता, सोनसाखळी सापडली नाही. तर, ही सोनसाखळी एका फळविक्रेत्या महिलेच्या हातगाडीसमोर ही साखळी पडल्याचे आणि थोड्या वेळाने एका महिनेने ती उचलून नेल्याचे एका सीसीटीव्हीत दिसले. पोलिसांनी तांत्रिक तपासात संबंधित संशयित महिलेस निष्पन्न केले व विचारपूस करून गहाळ झालेली सोनसाखळी तिच्याकडून हस्तगत करत मूळ मालक महिलेकडे सुपूर्त केली. पोलिस निरीक्षक अभिजित देशमुख यांच्या मार्गदर्शनाखाली सहायक पोलिस निरीक्षक शीतलकुमार डोईजड, अजित ननावरे, आशिष काळे, पी. सी. पेतुरे आदींनी या शोध मोहिमेत सहभाग घेतला.