वाकड, ता. ५ : गणेश नगर थेरगाव येथील खिंवसरा पाटील शिक्षण संकुलात गुरुपौर्णिमा सोहळा उत्साहात झाला. पाचवीच्या वर्गशिक्षिका स्मिता जोशी व कृत्तिका कोराम यांनी सजीव व निर्जीव गोष्टींमधील गुरूंची ओळख यानिमित्ताने करून दिली. अवघ्या जगाची गुरुमाऊली ज्ञानेश्वर माऊलींना वंदन करण्यासाठी हरिपाठ शिकण्यास आरंभ केला. विद्यार्थ्यांनी कथाकथन स्पर्धा, पाद्यपूजा करून शालेय स्वच्छता केली. चौथीने मातृपूजन व पाठ्यपुस्तक पूजन केले. वर्गशिक्षिका साक्षी कुरळे यांनी मातुःश्री मंगल माने यांचे पाद्यपूजा करून विद्यार्थ्यांना आई हा आपला पहिला गुरू आहे या वचनांची प्रचिती दिली. तसेच विद्यार्थ्यांनी भारतीय संविधान, ज्ञानेश्वरी, दासबोध या ग्रंथांचे पूजन केले. विद्यार्थ्यांना लेखन साहित्य भेट देण्यात आले. तिसरीच्या विद्यार्थ्यांनी गुरू शिष्यांच्या गोष्टींचे प्रकटवाचन केले. प्रमोदिनी बकरे यांनी मच्छिंद्रनाथ व गोरक्षनाथ यांची कथा सांगितली. विद्यार्थ्यांनी गुरुवंदना सादर केली. या सोहळ्याच्या आयोजनासाठी मुख्याध्यापक नटराज जगताप यांनी शिक्षकांना प्रेरणा दिली.