हिंजवडी, ता. ३ : आयटी पार्क हिंजवडी पोलिस ठाण्याच्या हद्दीतील माण-म्हाळुंगे रस्त्यातील ब्लोरिस सोसायटीच्या मागे बुधवारी (ता. ३) पीएमआरडीए प्रशासनाकडून पूल उभारण्याच्या कामासाठी जेसीबी मशिनच्या साहाय्याने खोदकाम होते. त्यावेळी बॉम्ब सदृश वस्तू आढळल्याने एकच खळबळ उडाली. हिंजवडीत बॉम्ब आढळण्याची ही तिसरी घटना ठरली आहे.
हा बॉम्ब पूर्णपणे गंजलेला असून, त्याची लांबी एक फूट व ४० सेंटीमीटर परीघ आहे. त्याचे वजन सुमारे चार किलो आहे. त्या बॉम्बची पाहणी करण्यासाठी व तो जिवंत असल्यास त्याला डिफ्युज करण्यासाठी हिंजवडी पोलिसांनी ‘बीडीडीएस’ पथकाला पाचारण केले होते. त्या पथकाने पाहणी करून तो बॉम्ब खड्ड्यात पुरून ठेवण्याच्या सूचना केल्या आहेत. त्यानुसार पोलिस ठाण्याच्या शेजारील मोकळ्या मैदानात तीन बाय चार फुटाच्या आकाराचा खड्डा खोदून त्याला सुरक्षित ठेवण्यात आले आहे. लष्कराच्या सदर्न कमांडकडे सुपूर्द करण्यासाठी आवश्यक तो पत्रव्यवहार केला जाणार आहे.
बॉम्बपासून नागरिकांच्या जिवाला कोणताही धोका उद्भवू शकणार नाही, असेही हिंजवडी पोलिसांकडून स्पष्ट करण्यात आले आहे. जुन्या काळी हिंजवडी पट्ट्यातील या भागात घनदाट जंगल व निर्जन भाग असल्याने ब्रिटिशांच्या काळात या भागात युद्धसराव केला जायचा. त्यादरम्यान निकामी न झालेले बॉम्ब जमिनीखाली गाडले गेले होते. त्यामुळे खोदकाम करताना वारंवार बॉम्ब आढळून येत आहेत, असेही काही ज्येष्ठ नागरिकांनी ‘सकाळ’ला सांगितले.
यापूर्वी सात वर्षापूर्वी व त्यानंतर एकदा असे दोन वेळेस हिंजवडी हद्दीत बॉम्ब आढळून आला आहे.

‘‘आम्ही बीडीडीएस पथकाला पाचारण केले होते. त्यांनी पाहणी केली आहे. त्यांच्या सूचनेनुसार तो बॉम्ब पोलिस ठाण्याच्या बाजूच्या मोकळ्या मैदानात खड्डा खोदून सुरक्षित ठेवण्यात आला आहे. सदर्न कमांडशी पत्रव्यवहार करून, त्यांच्या सूचनेनुसार कारवाई केली जाईल.
- कन्हैया थोरात,
वरिष्ठ पोलिस निरीक्षक हिंजवडी

फोटोः 05997, 05999