वाकड, ता. १२ : वाकड येथील श्री दत्त मंदिरात गुरुपौर्णिमेनिमित्त भव्य सोहळा पार पडला. दिवसभर आध्यात्मिक व धार्मिक कार्यक्रमांचे आयोजन करण्यात आले. रांगा लावून सुमारे दहा हजार भाविकांनी दर्शनाचा लाभ घेतला; तर २ हजारांहून अधिक भाविकांनी महाप्रसादाचा लाभ घेतला.
मंदिरात गुरुवारी (ता. ११) पहाटेपासूनच विविध धार्मिक विधी व कार्यक्रमांना सुरुवात झाली. पहाटे काकडा आरती, श्री दत्तात्रेय अभिषेक, दुपारी महिला मंडळाचे भजन, हरिपाठ, सायंकाळी शालीक महाराज कंधारे यांची प्रवचन सेवा पार पडली. साडेसात वाजता महाआरती झाली. श्री दत्तात्रेय महाराजांची मूर्ती विलोभनीय पुष्प अलंकारांनी सजविण्यात आली होती. संपूर्ण मंदिर परिसर फुले पानांच्या तोरणांनी सजविण्यात आला. संध्याकाळी आठ ते अकरा यावेळेत सुमारे दोन हजाराहून अधिक भाविकांनी महाप्रसादाचा लाभ घेतला. नवनाथ मंडळाचे पदाधिकारी व सदस्यांनी सोहळ्याचे संयोजन केले.