सकाळ इम्पॅक्ट

हिंजवडी, ता. १५ : ताथवडे येथील रोहन अनंता सोसायटी समोरील रस्त्याचे अपूर्ण कामे अखेर महापालिका प्रशासनाने मार्गी लावली. स्पीड टेबल आणि जीएसबी व्हीथ रॅम्पचे काम पूर्ण केले. या उपाय योजनांमुळे परिसरातील रहिवाशांना दिलासा मिळाला आहे.
रोहन अनंता सोसायटीबाहेर भरधाव डंपरमुळे एका महिलेला एक पाय गमवावा लागला. या अपघाताचे सविस्तर वृत्त ‘सकाळ’ने प्रसिद्ध करून येथील रस्त्यांची विदारक परिस्थिती व अपघात मालिकांकडे सर्वांचे लक्ष वेधले होते. या घटनेनंतर रहिवाशांनी तीव्र नाराजी व्यक्त करत माजी नगरसेवक राहुल कलाटे यांच्याकडे गाऱ्हाणे मांडले होते. कलाटे यांनी महापालिका प्रशासनाकडे पाठपुरावा केल्याने येथील रस्त्याची अर्धवट कामे पूर्ण करण्यात आली.
कलाटे यांनी येथील रस्त्याची दुरवस्था आणि अपघातांची भयाण परिस्थिती महापालिका अधिकाऱ्यांना विशद करून उपाय योजनांच्या सूचना केल्या. त्याची गंभीर दखल घेत अधिकाऱ्यांनी घटनास्थळी भेट देऊन परिसराची पाहणी केली आणि या घटनेनंतर अवघ्या दोन दिवसांत प्रशासनाने सोसायटी परिसरातील कामे पूर्ण केली.
WKD25A09038