हिंजवडी, ता. २२ : शिंदेवस्ती-मारुंजी रस्त्यावरील अपघात प्रकरणी हिंजवडी पोलिसांनी मिक्सर चालकासह रेडिमिक्स काँक्रिट (आरएमसी) प्लॅन्टच्या मालकालाही अटक केली. दोघांवर सदोष मनुष्यवधाचा गुन्हा दाखल करण्यात आला. शुक्रवारी (ता. २१) झालेल्या अपघात महाविद्यालयीन विद्यार्थिनी रिदा इम्रान खान हिचा जागीच मृत्यू झाला होता, तर तिचा मित्र विवेक ठाकूर (वय २१, रा. हडपसर) गंभीर जखमी झाला. याप्रकरणी पोलिस उपनिरीक्षक विकास ताकतोडे यांनी फिर्याद दिली. त्यानुसार चालक अजमल अन्सारी याने रस्त्याची परिस्थिती, इतर वाहने व पादचाऱ्यांचा जीव धोक्यात येईल याची कल्पना असूनही वाहन भरधाव आणि बेदरकारपणे चालवले. याबाबत नियंत्रण न ठेवल्याने आरएमसी प्लॅन्टचा मालक पांडुरंग घुले याला जबाबदार धरण्यात आले.
या अपघातानंतर परिसरातील नागरिक प्रचंड संतापले आहेत. मिक्सर दिवसभर राक्षसी वेगाने धावतात. या रस्त्यावर सतत होणारे अपघात आणि बेकायदा आरएमसी प्लॅन्टचा धोका कोण आणि केव्हा संपविणार, बेदरकार वाहनचालक आणि या मालकांचा मनमानी कारभार कधी थांबणार, असा सवाल नागरिक विचारत आहेत.
-----