पिंपरी : नाकबंदीच्या ठिकाणी दुचाकीस्वाराला थांबण्यास सांगितले असता, त्याने बंदोबस्तावरील पोलिसाला फरफटत नेले. ही घटना वाकड-हिंजवडी रोडवर इंडियन पेट्रोल पंपासमोर घडली. याप्रकरणी दुचाकी चालकाला अटक करण्यात आली आहे. (two-wheeler driver tote traffic police in wakad incident recorded in cctv footage)

संजय एकनाथ शेडगे (वय ४२, रा. आढाले, मावळ, पुणे) असे अटक केलेल्या आरोपीचे नाव आहे. याप्रकरणी हिंजवडी वाहतूक विभागाचे पोलिस हवालदार शंकर तुकाराम इंगळे (वय ४७) यांनी वाकड पोलिस ठाण्यात फिर्याद दिली आहे. वाकड हिंजवडी रोडवर इंडियन पेट्रोल पंपासमोर नाकाबंदी आहे. याठिकाणी फिर्यादी हे शुक्रवारी (ता. २८) सायंकाळी कर्तव्य बजावत असताना, दुचाकीवरून आलेल्या आरोपीला चौकशीसाठी थांबण्याचा इशारा केला.

चालकाने गाडी बाजूला घेतली; त्याला लायसन्स, कागदपत्रांची विचारणा केली असता, तो धक्का देऊन पळ काढू लागला. फिर्यादी यांचा हात गाडीच्या कॅरीअरमध्ये अडकला होता, तरीही आरोपीने फिर्यादी यांना ५० फूट फरफटत नेले. यामध्ये फिर्यादी यांना गंभीर दुखापत झाली.