पिंपरी : आकुर्डी येथील विठ्ठलवाडीत विठ्ठल मंदिरासमोर संत तुकाराम महाराज पालखी तळासाठी आरक्षित जागा आहे. या जागेवर अनधिकृतपणे गणपती विक्रीचे स्टॉल लावले आहेत. आरक्षित जागेवर अतिक्रमण केल्याबद्दल संबंधितावर कार्यवाही करावी, अशी मागणी विठ्ठल प्रतिष्ठानचे अध्यक्ष निखिल दळवी यांनी आयुक्त राजेश पाटील यांच्याकडे केली आहे.

आयुक्तांना दिलेल्या निवेदनात त्यांनी म्हटले आहे, की प्रभाग क्रमांक १४ मधील आरक्षित भूखंड संत तुकाराम महाराज पालखी तळासाठी आहे. ही जागा महापालिकेच्या ताब्यात आहे, तसेच किती जागा खासगी मालकीची आहे याची माहिती भूमि आणि जिंदगी विभाग, मुख्य अधिकारी नगररचना विभाग आणि स्थापत्य विभाग ‘अ’ क्षेत्रीय कार्यालयाने द्यावी. महापालिका हद्दीतील जागेवर गणपती विक्री स्टॉल टक्क्यानुसार द्यावेत. त्यांच्याकडून भूईभाडे, मंडप भाडेदरानुसार वसुल करावेत. फुकट्या स्टॉलधारकांवर लवकरात लवकर कार्यवाही करावी, असे दळवी यांनी म्हटले आहे.