पिंपरी : पिंपरी चिंचवड शहर जिल्हा युवक काँग्रेसच्यावतीने डॉ. बाबासाहेब आंबेडकर चौकात आज (ता.१७) केंद्रातील भाजपाच्या मोदी सरकार विरोधात “मी बेराजगार कोण जबाबदार” हे आंदोलन करण्यात आले. या आंदोलनात मोठ्या संख्येने ‘बेरोजगार तरूणांनी सहभाग घेत प्रतिकात्मक स्वरूपात हातगाडीवर केळी व नारळ विक्री करत तीव्र भावना व्यक्त केल्या.

पुणे जिल्हा इंटक चे अध्यक्ष डॉ. कैलास कदम, युवक काँग्रेसचे शहराध्यक्ष नरेंद्र बनसोडे यांनी या आंदोलनाचे नेतृत्व केले. पिंपरी चिंचवड काँग्रेस सेवादलाचे शहराध्यक्ष विरेंद्र गायकवाड, एनएसयुआयचे शहराध्यक्ष डॉ. वसीम ईनामदार, युवक काँग्रेसचे उपाध्यक्ष स्वप्निल बनसोडे, जिल्हा सरचिटणीस रवी नांगरे, अलोक लाड, अर्णव कामठे, योगेश नायडू, गणेश नांगरे, अनिल सोनकांबळे, एकनाथ मुंढे, प्रकाश पठारे, असिफ शेख, पिंपरी विधानसभा युवक काँग्रेस चे अध्यक्ष हिराचंद जाधव, भोसरी विधानसभा अध्यक्ष नासीर चौधरी, चिंचवड विधानसभा उपाध्यक्ष सौरभ शिंदे, सोहेल मुलाणी, अजय काटे, प्रथमेश वाघमारे, शिवा पल्लेडवाड, विक्रम कुसाळकर, सुमित मंडल, रोहन मडिकर आदींनी सहभाग घेतला.

इंटकचे अध्यक्ष कदम म्हणाले “या केंद्रातील सरकारच्या धोरणांमुळे देशात अनेक समस्या उभ्या राहिल्या आहेत. त्यापैकी एक मोठी समस्या म्हणजे बेरोजगारी आहे. त्यामुळे कुटूंबे उध्वस्त झाली आहेत. युवक आज हवालदिल होऊन बेजार झाला आहे. कामगार कायदे अन्यायकारक पणे लादले जात आहेत. त्यामुळे कामगारवर्ग असुरक्षित झाला आहे. ’’

युवक काँग्रेसचे शहराध्यक्षबनसोडे म्हणाले, ‘‘आज प्रत्येक सुशिक्षित बेरोजगार तरूणास मी बेरोजगार, याला कोण जबाबदार ? असा प्रश्न भेडसावत आहे. बेरोजगारीमुळे देशातील युवक हा गुन्हेगारीकडे वळत आहे. आज पंतप्रधान मोदींजीचा वाढदिवस आहे. त्यांना या विषयी चे गांभीर्य अधिक तीव्रतेने कळावे यासाठी देशव्यापी स्वरूपात हे आंदोलन युवक काँग्रेसच्या माध्यमातून करून केले आहे.