Shashank Ketkar : अभिनेता शशांक केतकर कायमच त्याच्या सोशल मीडिया पोस्टमुळे चर्चेत असतो. फक्त त्याचं वैयक्तिक आयुष्यच नाही तर सामाजिक मुद्द्यांवरही तो सोशल मीडियाच्या माध्यमातून भाष्य करत असतो. सोशल मीडियावर त्याच्या पोस्ट चर्चेत असतात.

ठाणे ते मीरा रोड या दरम्यान होणारं ट्रॅफिक ही नेहमीची समस्या बनली आहे. याचा त्रास अनेकांना भोगावा लागतो. नुकताच सोशल मीडियावर व्हिडीओ शेअर करत शशांकने यावर भाष्य केलं. शशांक या ट्रॅफिकमध्ये जवळपास तासभर अडकला असून याबाबत एक व्हिडिओ सोशल मीडियावर शेअर करत त्याचा संताप त्याने व्यक्त केला.

शशांकने शेअर केलेल्या व्हिडिओमध्ये ठाणे ते मीरा रोड दरम्यान झालेल्या ट्रॅफिकचा व्हिडीओ शेअर केला. या व्हिडीओमध्ये सगळ्या गाड्या एकाच जागी थांबलेल्या पाहायला मिळत आहे. व्हिडिओमध्ये शशांकने उपहासात्मक पद्धतीने त्याचा संताप व्यक्त केला. तो म्हणाला,"वाव, मीरा रोड आणि ठाण्याच्या मध्ये लोणावळ्याचा फील देण्यासाठी ही एक योजना आखली आहे. खरंतर आपल्याला कारण कळत नाही. सिग्नल चांगले लावून सिग्नलचे खर्च वाढवण्यापेक्षा रस्त्यात खड्डे, चुकीच्या दिशेने येणाऱ्या गाड्या आणि बेशिस्तपणा यामुळे सिग्नलचं एक वेगळं काम आपल्याचकडून केलं जातंय ही वेगळी दृष्टी आपल्याच देशाकडे आहे. मला फार बरं वाटतंय सिग्नलचा हा खर्च वाचतो, खड्ड्यांमुळे स्पीड ब्रेकर्सचा खर्च वाचतो. केवढी वेगळी दृष्टी लागते या सगळ्याला. लोकांचा वेळ, जीव तसही भारतात फार महत्त्वाचं नाहीये. आता लोकांनी गाड्यातून उतरून चालत जाण्याचा निर्णय घेतलाय. मी पण आता गाडी इथेच पार्क करून चालत सेटवर जाण्याचा विचार करतोय. रात्री ९-१० पर्यंत या गाड्या हलतील असं मला काही वाटत नाही. क्या बात है!"

"खड्डे आणि indiscipline, so true.... किती किती गोष्टींचा त्रास करुन घ्यायचा नाही, असं स्वतःला समजवायचं? देवा" असं कॅप्शन शशांकने या व्हिडिओला दिल असून त्याने शेअर केलेल्या या व्हिडिओवर अनेकांनी कमेंट्सच्या माध्यमातून त्यांचा संताप व्यक्त केला आहे.

या आधीही शशांकने फिल्मसिटीच्या बाहेर असलेल्या कचऱ्याच्या ढिगाबाबत संतापजनक पोस्ट शेअर केली होती. त्यावर तात्काळ कारवाई करण्यात आली होती.