मुंबई- ब्रिटिश रॉक बँड कोल्डप्ले (Coldplay) सध्या राज्यात चर्चेचा विषय आहे. असे असताना या संदर्भात एक मोठी माहिती समोर येत आहे. कोल्डप्ले बँडचा प्रमुख ख्रिस मार्टिन याने ग्रुप कधी निवृत्ती घेणार याबाबत खुलासा केला आहे. Apple Music वरील झेन लोवेला दिलेल्या मुलाखतीत ख्रिस म्हणालाय की, १२ वा अल्बम निघाल्यानंतर ते थांबणार आहेत.

कोल्डप्लेच्या सध्या १० व्या अल्बमची जोरदार चर्चा सुरु आहे. हा अल्बम ४ ऑक्टोबर २०२४ रोजी रिलिझ होणार आहे. त्यात ख्रिसने स्पष्ट केलंय की, त्याची टीम १२ वा अल्बम निघाल्यानंतर थांबणार आहे. तो म्हणाला की, आम्ही फक्त १२ व्या अल्बमपर्यंतच जाणार आहोत आणि हे निश्चित आहे.

आम्ही किती अल्बम काढायचे याबाबत निश्चित आहोत. आम्हाला जास्त अल्बम काढायचे नाही. कमी हेच जास्त असते. आमच्या विरोधकांसाठी ते आणखी कमी केलं असतं तरी ते जास्त राहिलं असतं. मला वाटतं आपण आपली मर्यादा ठरवून घेणे महत्त्वाचे असते, असं देखील ख्रिस म्हणाला आहे.

ख्रिसने स्पष्ट केलं की, त्याचा हा निर्णय जुन्या बँड म्युझिकल हिरोंकडून प्रेरणा घेऊन घेण्यात आलेला आहे. यावेळी त्याने बॉब मार्लेचं नाव घेतलं. फक्त सातच हॅरी पॉटरचे पार्ट्स आहेत. बिटल्स केवळ साडेबारा आहेत. कमी केल्यामुळे आपण गुणवत्तेकडे लक्ष देतो. या मानसिकतेमुळे म्युझिकचा दर्जा वाढतो आणि गुणवत्तेकडे जास्त लक्ष दिलं जातं. ही सर्वात महत्त्वाची गोष्ट आहे.

एक उत्तम दर्जाचा बँड आणि अल्बम तयार करणे कष्टाचे काम आहे. यात माणसांची मोठी गुंतवणूक असते. त्यामुळे मला आता माझ्या सहकाऱ्यांना त्यांचे आयुष्य जगण्याची संधी द्यायची आहे, असं ख्रिस म्हणाला. यापूर्वी ख्रिसने आपण २०२५ मध्ये शेवटचा अल्बम रिलिझ करू असे संकेत दिले होते. मात्र, बँड जुनेच अल्बमचे गाणे जगातील दौऱ्यादरम्यान सादर करण्याची शक्यता आहे.

कोल्डप्ले बँडमध्ये सध्या असलेले सदस्य

ख्रिस मार्टिन (गायक आणि पियानोवादक), जॉनी बकलँड (गिटार वादक), गाय बेरीमन (बासवादक), आणि विल चॅम्पियन (ड्रमर आणि तालवादक), फिल हार्वे त्यांचा मॅनेजर म्हणून काम करतो.