छोट्या पडद्यावर अनेक नव्या मालिका प्रेक्षकांच्या भेटीला आल्या. या मालिकांनी अल्पावधीत प्रेक्षकांच्या मनात घर केलं. अशीच एक मालिका नुकतीच प्रेक्षकांच्या भेटीला आली ती म्हणजे कलर्स मराठी वाहिनीवरील 'आई तुळजाभवानी'. साडेतीन शक्तिपीठांपैकी एक असलेल्या तुळजाभवानी मातेची गाथा दाखवणारी ही मालिका आता प्रेक्षकांच्या पसंतीस उतरली आहे. मालिका सुरू झाल्यानंतर काही आठवड्यातच या मालिकेला प्रेक्षकांचा चांगला प्रतिसाद मिळतोय. प्रेक्षक आवडीने ही मालिका पाहतात. मात्र कालच्या भागात म्हणजेच २४ ऑक्टोबर रोजी वाहिनीने मालिकेचा जुनाच भाग प्रक्षेपित केला त्यामुळे प्रेक्षकही गोंधळले. त्यांनी वाहिनीवर रोष व्यक्त केल्यानंतर आता वाहिनीने देखील माफी मागणारी पोस्ट शेअर केली आहे.

चांगला व्हीएफएक्स, गोष्टीची उत्तम मांडणी, चांगले कलाकार यामुळे 'आई तुळजाभवानी' ही मालिका काही दिवसातच प्रेक्षकांची आवडती बनली. मात्र या मालिकेच्या कालच्या ( २४ ऑक्टोबर २०२४ ) एपिसोडचं प्रसारण तांत्रिक कारणास्तव रद्द करण्यात आलं. अचानक जुनाच भाग प्रक्षेपित झाल्याने प्रेक्षकही गोंधळले. त्यानंतर अनेकांनी कलर्स वाहिनीच्या ऑफिशिअल पेजवर याबद्दल विचारणा केली. त्यानंतर मात्र वाहिनीने एक पोस्ट करत याबद्दल दिलगिरी व्यक्त केली. कलर्सने एक पोस्ट करत लिहिलं, 'काही तांत्रिक कारणांमुळे तुमच्या आवडत्या मालिकेचा ‘आई तुळजाभवानी’चा कालचा भाग आज दाखवण्यात आला. उद्यापासून मालिका नियमितपणे दररोज रात्री ९ वाजता प्रसारित होईल. गैरसोयीबद्दल क्षमस्व!'

‘आई तुळजाभवानी’ या मालिकेत अभिनेत्री पूजा काळे मुख्य भूमिका साकारत आहे. पूजा काळे ही भरतनाट्यम नृत्यांगना आहे. तसेच तिने कथकचंही शिक्षण घेतलं आहे. या मालिकेच्या निमित्ताने पूजाने मालिका विश्वात पदार्पण केलं आहे. ही मालिका सध्या प्रेक्षकांच्या पसंतीस उतरते आहे.