Bigg Boss Marathi 5 Latest Update : बिग बॉस मराठी सीजन ५ पहिल्याच दिवसापासून चर्चेत आहे. अगदी पहिल्याच आठवड्यात अभिनेत्री निक्की तांबोळी या सीजनची व्हिलन ठरली आहे. तिचा घरातील वावर अनेकांना खटकतोय. बिग बॉस मराठी सीजन ३ चा उपविजेता जय दुधानेही सोशल मीडियावर पोस्ट शेअर करत निक्कीला खडेबोल सुनावले.

जयने नुकतीच इंस्टाग्राम स्टोरीमध्ये निक्की आणि जान्हवीसाठी खास पोस्ट शेअर केली. यावेळी त्याने स्पर्धक अभिजीत सावंतचंही कौतुक केलं. तर वर्षा उसगांवकर यांचा घरात होणाऱ्या अपमानाबद्दलही तो व्यक्त झाला.

जयने सोशल मीडियावर पोस्ट करत जाहीर केलं कि,"निक्की तांबोळी ही बिग बॉस मराठीच्या इतिहासातील सगळ्यात वाईट स्पर्धक आहे." तर जान्हवीविषयी बोलताना म्हणाला कि,"अभिजीत सावंतचं कौतुक कि त्याने जान्हवी उर्फ बुगु बुगुला दाखवून दिलं कि ती आपल्या महाराष्ट्राच्या सुपरस्टार असलेल्या वर्षा ताईंबरोबर कशी वागली आहे ते. हे खूपच भयंकर आणि अपमानास्पद होतं. मी ज्या सिजनमध्ये खेळलो तिथे माझंही अनेकांशी भांडण झालं पण मला अजूनही लक्षात आहे आमच्यातील एकाही स्पर्धकाने कोणत्याही सिनियर स्पर्धकाचा अपमान केला नाही."

याबरोबरच जयने एक व्हिडीओ शेअर केला आहे. महेश मांजरेकर यांनी अमोल परचुरे यांना मुलाखत दिली आहे त्याची छोटीसी झलक यात पाहायला मिळतेय. यात मांजरेकर जय विषयी बोलताना दिसले. ते म्हणाले कि,"जय दुधाने हा असा स्पर्धक होता कि त्याला मी कितीही सांगितलं तरीही त्याने त्याचं वागणं बदललं नाही. तो जेव्हा बाहेर आला तेव्हा मी त्याला म्हणालो कि, तू जरा माझं म्हणणं ऐकलं असतंस तर तो शो तू जिंकला असतास." जयने याबद्दल महेश यांचे आभार मानले.

बिग बॉस मराठीच्या कालच्या २ ऑगस्टच्या भागात पाहायला मिळालं कि, जान्हवी आणि निक्की मुद्दाम खाली झोपल्या म्हणजे वर्षा यांना वाटेत झोपायला लागेल. यावरून अभिजीत सावंतने जान्हवीला दुसऱ्या दिवशी सुनावलं. वर्षा यांना मिळणाऱ्या अपमानास्पद वागणुकीवरून निक्की आणि जान्हवीवर सर्व स्तरातून टीका होतेय.