Sai Tamhankar Mother: मराठमोळी अभिनेत्री सई ताम्हणकर हिने आपल्या अभिनयाने प्रेक्षकांची मनं जिंकली. मराठी सिनेसृष्टीतील दिग्गज अभिनेत्रींपैकी एक असणारी सई आज हिंदी सिनेसृष्टीवरही राज करतेय. आज २५ जून रोजी सईचा वाढदिवस आहे. तिने 'हंटर', 'भक्षक', 'मीमी' यांसारख्या चित्रपटातून प्रेक्षकांच्या मनाचा ठाव घेणारी सई लवकरच नागराज मंजुळे यांच्या 'मटका किंग या हिंदी सीरिजमध्ये झळकणार आहे. सई आज लोकप्रियतेच्या शिखरावर आहे. मात्र सई तिच्या आईसोबत राहत नाही. त्या दोघी वर्षातून केवळ सहा महिने किंवा त्यापेक्षाही कमी वेळ एकत्र राहतात. त्यामागचं कारण अभिनेत्रीने स्वतः एका मुलाखतीत सांगितलं होतं.

सईने नेहमीच वेगवेगळ्या भूमिका साकारत चाहत्यांना चकीत केलं. मात्र तिचा इथवरचा प्रवास मुळीच सोपा नव्हता. तिच्या आजवरच्या प्रवासात तिची आई कायम तिच्या सोबत होती. सईने मुंबईत आलिशान घर घेतलं मात्र सई तिच्या आईसोबत राहत नाही. सई मूळची सांगलीची. मात्र तिने कामासाठी फार १९ व्या वर्षी घर सोडलं. तर मुंबईत ती तब्बल १० ठिकाणी राहिली. त्यामुळेच तिने तिच्या घराला द इलेव्हन्थ प्लेस असं नाव दिलं आहे. सई वर्षातून केवळ सहा महिने किंवा त्यापेक्षाही कमी आई जवळ राहते. त्याबद्दल बोलताना सई म्हणालेली, 'आमचं एकमेकींवर खूप प्रेम आहे. पण आम्ही एकमेकांसोबत नाही राहत.'

सई पुढे म्हणाली, 'मी आम्हा दोघींनाही तलवारीची उपमा देईन. जशा एका म्यानात दोन तलवारी राहू शकत नाहीत. तसं आम्ही दोघी एका घरात एकत्र नाही राहू शकत. आम्ही वर्षातून सहा महिने एकत्र असतो आणि सहा महिने वेगवेगळं राहतो. पण या तलवारींनी लढलेल्या लढाया आणि त्यांचा प्रवास हा माझ्या दृष्टीने खूप मोठा आहे. अनेक लढाया जिंकून आम्ही इथपर्यंत पोहोचलो आहोत.' सईच्या पुढील प्रोजेक्टची चाहते आतुरतेने वाट पाहत आहेत.