लोकप्रिय दाक्षिणात्य अभिनेत्री सामंथा आणि अभिनेता नागा चैतन्य यांची जोडी प्रेक्षकांची प्रचंड आवडती होती. मात्र २०२१ मध्ये त्यांनी घटस्फोट घेत असल्याचं सांगत चाहत्यांना मोठा धक्का बसला होता. त्यांच्या घटस्फोटाची वेगवेगळी कारणं सांगण्यात येत होती. मात्र आता त्यांच्या घटस्फोट प्रकरणात एक धक्कादायक ट्विस्ट समोर येतोय. त्यांच्या घटस्फोटावरून एका नव्या वादाला तोंड फुटलं आहे. अभिनेत्री समंथा आणि नागा चैतन्य यांच्या घटस्फोटासाठी बीआरएस नेते केटी रामाराव (KTR) जबाबदार असल्याचं वक्तव्य मंत्री सुरेखा यांनी केलं आहे. मात्र यावर सामंथा आणि नाग चैतन्य या दोघांनीही संताप व्यक्त केला आहे.

नागा चैतन्य आणि समंथा रुथ प्रभू यांचा ऑक्टोबर 2021 मध्ये घटस्फोट झाला. दोघांचे लग्न चार वर्षेही टिकू शकलं नाही. कोंडा यांनी हा घटस्फोट नेते केटी रामाराव यांच्यामुळे झाला असल्याचं म्हटलं. त्यावर सामंथाने एक पोस्ट करत त्यांना सुनावलं आहे. सामंथाने लिहिलं, 'एक स्त्री असणे आणि बाहेर पडणे आणि काम करणे आणि एका ग्लॅमरस उद्योगात टिकून राहणे, जिथे महिलांना बहुतेक प्रॉप्ससारखे वागवले जाते. प्रेमात पडणे, ठेच लागणे आणि उठणे आणि पुन्हा लढणे, त्यासाठी खूप हिंमत लागते. कोंडा सुरेखा गरु... मला माझ्या प्रवासाचा अभिमान आहे. कृपया माझ्या प्रवासावर चिखलफेक करू नका. मला आशा आहे की, मंत्री या नात्याने तुमचे बोलणे खूप महत्त्वाचे आहे, याची तुम्हाला कल्पना असेल. मी तुम्हाला विनंती करते की, तुम्ही लोकांच्या गोपनीयतेबद्दल जबाबदार राहून आदर बाळगावा.'

यासोबतच नागा चैतन्य यानेही एक पोस्ट केली आहे. त्याने पोस्ट करत लिहिलं, ''घटस्फोटाचा निर्णय हा जीवनातील सर्वात वेदनादायक आणि दुर्दैवी निर्णयांपैकी एक आहे. खूप विचार केल्यानंतर, मी आणि माझ्या पूर्वीश्रमीच्या पत्नीने वेगळे होण्याचा निर्णय घेतला. माझ्या पूर्वीश्रमीच्या पत्नीविषयी तसेच माझ्या कुटुंबाविषयीच्या आदरापोटी मी आतापर्यंत या सर्व गोष्टींबाबत मौन बाळगलं. मंत्री कोंडा सुरेखा गरु यांनी केलेला दावा खोटाच नाही तर निव्वळ हास्यास्पद आणि अस्वीकार्य आहे. महिलांना पाठिंबा आणि सन्मान मिळायला हवा. प्रसिद्धीमाध्यमांमध्ये चर्चेत येण्यासाठी सेलिब्रिटींच्या वैयक्तिक आयुष्यातील निर्णयांचा गैरफायदा घेणे आणि शोषण करणे, हे लज्जास्पद आहे.' त्या दोघांनीही यावर आपलं मत मांडत हा दावा खोटा असल्याचं सांगितलं आहे.