अभिनेते पंकज त्रिपाठी, राजकुमार राव आणि अभिनेत्री श्रद्धा कपूर यांच्या 'स्त्री २'ची प्रेक्षक आतुरतेने वाट पाहत आहेत. हा चित्रपट १५ ऑगस्ट रोजी प्रदर्शित होणार आहे. मात्र त्यापूर्वी २४ जुलै रोजी या चित्रपटातील पहिलं गाणं प्रदर्शित करण्यात आलं. या गाण्यातून अभिनेत्री तमन्ना भाटिया हिने आपला जलवा दाखवला आहे. या चित्रपटात तमन्ना 'आज की रात' या गाण्यावर थिरकताना दिसतेय. मात्र तमन्नाचं हे गाणं फारसं कमाल दाखवू शकलेलं नाही. तिचा डान्स पाहून चाहते निराश झाले आहेत. ते आता तमन्नाची तुलना नोरा फतेही हिच्याशी करत आहेत.

पहिल्या भागात नोरा ही कमरिया या गाण्यावर ठुमके लगावताना दिसली होती. हे गाणं प्रचंड गाजलं होतं. चाहते या गाण्याचे चाहते झाले होते. कमरिया हे गाणं प्रत्येक कार्यक्रमात वाजत होतं. मात्र 'स्त्री २' मधील 'आज की रात' हे गाणं तशी कमाल दाखवू शकलेलं नाही. या गाण्याचे बोलही प्रेक्षकांना आवडलेले नाहीत. त्यावर या गाण्याचं संगीतही नेटकऱ्यांना पसंत पडलेलं नाही. त्यावर भर म्हणून तमन्नाचा डान्सही फारशी कमाल दाखवू शकलेला नाही. तमन्ना या गाण्यात 'जेलर' चित्रपटातील 'आ लुका वालिया' या गाण्यासारखीच डान्स करताना दिसत आहे. तिने कपडेदेखील तसेच घातले आहेत. त्यामुळे नवीन काही नसल्याने चाहते निराश झाले आहेत.

याबद्दल बोलताना एका नेटकऱ्याने लिहिलं, 'स्त्री मधील कमरिया या गाण्याच्या तुलनेत हे गाणं काहीच नाहीये.' एका युझरने लिहिलं, 'सगळ्यात बेकार गाणं.' आणखी एकाने लिहिलं, 'पूर्णपणे वाईट आहे हे खराब संगीत आणि वाईब.' दुसऱ्या युझरने लिहिलं, 'सध्या कोरिओग्राफीमध्ये काय चाललंय, अशा फालतू गोष्टी बघायला मिळतायत. आणखी एकाने लिहिलं, 'नोरा फतेहीच्या कमरिया गाण्याच्या पुढे काहीच नाहीये हे.' अनेकांनी या गाण्याचं कौतुकही केलं आहे परंतु, हे गाणं प्रेक्षकांच्या अपेक्षांवर खरं ठरलं नाहीये असं दिसतंय.