Sonakshi Sinha Zaheer Iqbal Wedding: गेले कित्येक दिवस सोशल मीडियावर एकच चर्चा होती ती म्हणजे अभिनेत्री सोनाक्षी सिन्हा आणि झहीर इकबाल यांच्या लग्नाची. ते दोघेही कोणत्या पद्धतीने लग्न करणार, लग्नात कोणते कपडे घालणार इथपासून लग्नातील पाहुण्यापर्यंत सगळंच जाणून घेण्यासाठी चाहते उत्सुक होते. आता अखेर सोनाक्षी आणि झहीर यांनी २३ जून २०२४ रोजी लग्नगाठ बांधली. त्यांनी नोंदणी पद्धतीने विवाह केला. त्यांच्या लग्नासाठी बॉलिवूडमधील अनेक दिग्गज कलाकारांनी हजेरी लावली. त्यांनी शिल्पा शेट्टीच्या रेस्टॉरंटमध्ये रिसेप्शन आयोजित केलं होतं. मात्र त्यांनी लग्नासाठी २३ जून हीच तारीख का निवडली हे तुम्हाला ठाऊक आहे का?

काय आहे कारण?

सोनाक्षीच्या लग्नाला सलमान, तब्बू, रेखा, काजोल, अनिल कपूर यांच्यासह अनेक कलाकारांनी हजेरी लावली. त्यांचा रिसेप्शन लूकदेखील सोशल मीडियावर चांगलाच चर्चेत होता. लाल साडी, कुंकू, चुडा यात सोनाक्षी खूप सुंदर दिसत होती. त्यांनी आपल्या रिसेप्शनला डान्सदेखील केला. मात्र त्यांनी २३ जून रोजी लग्न कारण्यामागेही खास कारण आहे. त्यांनी याचं कारण त्यांच्या फोटोमध्ये सांगितलं आहे. २३ जून रोजी त्यांनी एकमेकांना होकार दिला होता. २३ जून रोजीच त्यांचं नातं सुरू झालं.

सोनाक्षी आणि झहीरने आपले फोटो शेअर करत लिहिलं, 'आजपासून ७ वर्ष आधी आजच्याच दिवशी २३ जून २०१७ रोजी आम्ही एकमेकांच्या डोळ्यात एकमेकांसाठी प्रेम पाहिलं. आणि ते प्रेम कायम ठेवायचा निर्णय घेतला. आज त्याचं प्रेमाने आम्हाला इथपर्यंत पोहोचवलं आहे. आज आमची दोन्ही कुटुंब आणि दोन्ही देवांच्या आशीर्वादाने आम्ही आता पती पत्नी आहोत.' सोनाक्षी आणि झहीर यांची पहिली भेट ही सलमान खानने आयोजित केलेल्या पार्टीमध्ये झाली होती. सात वर्ष डेट केल्यानंतर त्यांनी २३ जूनला लग्नगाठ बांधली.