पुणे : सकाळपासून उत्साहात प्रारंभ झाला. पण मतदार यादीतील मतदारांना मतदान केंद्रावर ताटकळत बसण्याची वेळ आली. नावात बदल, फोटोत बदल असल्याने मतदारांना मतदानाच्या हक्कापासून दूर राहवे लागत आहे. दरम्यान, याबाबत काय करायचे अशी विचारणा मतदार करू लागले आहेत. मात्र, यावर कोणताही उपाय होत नसल्याने मतदार नाराज होत आहेत. या मतदारसंघात सकाळी 11 वाजेपर्यंत 14 टक्के मतदान झाले होते.

कोथरूडमधील बहुतांश मतदान केंद्रावर मतदानासाठी मतदारांची मोठी गर्दी होती. त्यामध्ये ज्येष्ठ नागरिक, युवक, महिलांचा समावेश होता. अकरानंतर मात्र ही गर्दी कमी झाली. दरम्यान, काही मतदान केंद्रावर तक्रारी असल्याचे पुढे आले. त्यामध्ये मतदान केंद्र बदलने, नावात बदल, फोटो चेहऱ्याशी जुळत नाही, अशा कारणांमुळे अनेक नागरिकांना मतदान करता येत नसल्याच्या तक्रारी मतदारांनी केल्या. मात्र, ते मतदानावर अडून राहिल्याने अधिकारी आणि मतदार यांच्यात वादाच्या घटना घडल्या. त्यात राजकीय पक्षांच्या कार्यकर्त्यांनी हस्तक्षेप केल्याने वादात भर पडली. त्यामुळे मतदारांना मतदानाविना परत जावे लागत असल्याचे चित्र पाहायला मिळाले.