पुणे : भरधाव वाहनाने दुचाकीवरील दांपत्यास धडक दिल्यामुळे एका महिलेचा मृत्यू झाला. तर, दुचाकीस्वार पती गंभीर जखमी झाल्याची घटना पुणे- सोलापूर महामार्गावर सोरतापवाडी (ता. हवेली) येथे घडली.

छाया सुहास जाधव (वय ३४) असे मृत्युमुखी पडलेल्या महिलेचे नाव आहे. सुहास शरद जाधव (वय ४०) हे गंभीर जखमी झाले असून, त्यांच्यावर रुग्णालयात उपचार सुरू आहेत. या प्रकरणी छाया यांची बहीण रेणुका नामदेव साळुंखे (वय ३२, रा. माळवाडी, सोरतापवाडी, ता. हवेली) यांनी फिर्याद दिली आहे. त्यावरून वाहनचालकाविरुद्ध लोणी काळभोर पोलिस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, सुहास आणि त्यांची पत्नी छाया हे दोघे पुणे-सोलापूर दुचाकीवरून होते. भरधाव वाहनाने सोरतापवाडी परिसरातील पुलाजवळ त्यांच्या दुचाकीला पाठीमागून धडक दिली. या अपघातात गंभीर जखमी झाल्यामुळे दुचाकीस्वार शरद आणि त्यांची पत्नी छाया यांना रुग्णालयात दाखल करण्यात आले. परंतु उपचारापूर्वीच छाया यांचा मृत्यू झाला.