तळेगाव स्टेशन : चाकण महामार्गावरील फलकेवाडी परिसरातील सरस प्लाझा इमारतीमधील बँक ऑफ बडोदाचे एटीएम केंद्र आज शनिवारी (ता.१६) सकाळी साडेआठच्या दरम्यान लागलेल्या आगीत पूर्णपणे जळून खाक झाले.

ताज्या बातम्यांसाठी डाऊनलोड करा ई-सकाळचे ऍप

स्थानिक नगरसेवक गणेश खांडगे आणि आजूबाजूच्या नागरिकांमार्फत आगीची माहिती मिळाल्यानंतर तळेगाव दाभाडे नगरपरिषदेचे अग्निशमन बंब त्वरीत घटनास्थळी दाखल झाले. अग्निशमन दलाने अर्धा तासात आग आटोक्यात आणली. आगीमध्ये एटीएम मशीन आणि एसी पुर्णपणे जळून खाक झाले. रोकडीबाबत माहीती उपलब्ध होऊ शकली नाही.

शेजारीच अगदी खेटून असलेल्या बडोदा बँकेचे कार्यालय मात्र आगीपासून बचावले.रहिवासी आणि वाणिज्य वापर असलेल्या या सरस प्लाझा इमारतीच्या दुसऱ्या मजल्यावर राहणा-या सतीश काटापुरकर आणि डाॅ.मिलिंद कांजाळकर यांच्या दोन कुटुंबांना या आगीची झळ बसली.एटीएम केंद्राच्या अगदी वर असलेल्या त्यांच्या सदनिकांच्या खिडक्यांच्या काचा फुटून घरात प्रचंड धुर पसरला. भयभीत रहिवाशांनी भितीने इमारतीच्या बाहेर धाव घेतली. विशेष म्हणजे या एटीएम केंद्रात अत्यावश्यक कार्बन डायाॅक्साईड अग्निरोधक नळकांडे उपलब्ध नव्हते. शेजारी जे उपलब्ध होते त्याची मुदत संपली होती. त्यामुळे या रासायनिक पावडर (डीसीपी) अग्निरोधक नळकांड्यांच्या सहाय्याने आगीवर फवारणी करताच आग आणखीनच भडकली.

पुण्याच्या बातम्या वाचण्यासाठी येथे ► क्लिक करा

अग्निशमन दलाने पाण्याच्या फवा-याने ती आटोक्यात आणली. तळेगाव दाभाडे पोलिस ठाण्याचे सहायक पोलिस निरीक्षक राहुल साळी यांनी घटनास्थळी पोहोचत आग आणि नुकसानीची माहिती घेतली. तळेगावातील बहुतांश रहिवाशी इमारतींच्या तळमजल्यावरील गाळ्यांमध्ये असलेल्या एटीएम केंद्र आणि बेकरींमध्ये सुरक्षिततेच्या कसल्याही उपाययोजना केलेल्या दिसत नाहीत. त्यामुळे भविष्यात मोठया दुर्घटनेचा संभव आहे.