पुणे - बालगंधर्व रंगमंदिराची फेरउभारणी करण्याच्या योजनेला गती आली असतानाच ‘मूळ रंगमंदिराला फारसा धक्का लागणार नाही, याची काळजी घेऊ,’ अशी भूमिका महापौर मुक्ता टिळक यांनी सोमवारी मांडली. दुसरीकडे मात्र ‘नवा रंगमंच बांधून नवीन काही करणार आहात का,’ असा प्रश्‍न विचारत ज्येष्ठ रंगकर्मी वामन केंद्रे यांनी बालगंधर्व रंगमंदिर पाडण्याला अप्रत्यक्षपणे विरोध दर्शविला. 

बालगंधर्व रंगमंदिराच्या ५२ व्या वर्धापनदिनानिमित्त कार्यक्रमाचे आयोजन करण्यात आले होते. त्या वेळी बालगंधर्व रंगमंदिराबाबत नव्याने  विषय पुढे आला. या वेळी केंद्रे, टिळक यांच्यासह चित्रपट महामंडळाचे अध्यक्ष मेघराज राजेभोसले, राष्ट्रीय चित्रपट संग्रहालयाचे संचालक प्रकाश मगदूम आदी उपस्थित होते. ज्येष्ठ संगीतकर्मी इनॉक डॅनियल्स यांना या कार्यक्रमात यंदाचा ‘जीवनगौरव पुरस्कार’ प्रदान करण्यात आला. तर, ज्येष्ठ पत्रकार मुकुंद संगोराम यांना बालगंधर्व विशेष गौरव व बालगंधर्व रंगमंदिराचे व्यवस्थापक सुनील मते यांना ‘बालगंधर्व पुरस्काराने’ सन्मानित करण्यात आले. या वेळी महापौर म्हणाल्या, ‘‘सध्या शहरात वाहनांची संख्या वाढतेय.

बालगंधर्व रंगमंदिर हे मध्यवर्ती ठिकाण आहे. परंतु जुने मंदिर न पाडता ते सुधारण्याचा विचार करीत आहोत. समाजाच्या, रंगकर्मींच्या भावना, आधुनिक दृष्टिकोन व तंत्रज्ञान हे सर्व सांभाळून रंगमंदिर अद्ययावत केले जाईल.’’ 

त्यावर केंद्रे ताशेरे ओढत म्हणाले, ‘‘आपल्याला केवळ नवे सुचते. त्यातून चांगल होणार असेल, तर ठीक. थिएटर कसे असावे, याचा उत्तम नमुना म्हणजे ‘बालगंधर्व’ आहे. ही केवळ वास्तू नसून भारताची संस्कृती आहे. ती आहे त्या परिस्थितीत डागडुजी करून आधुनिक पद्धतीने जपली पाहिजे.

सरकार येईलही व जाईलही त्यातील सर्व लोक सांस्कृतिकदृष्ट्या संवेदनशील असतीलच असे नाही. परंतु, त्यांच्यावर नजर ठेवणे आपले काम आहे.’’ बालगंधर्व रंगमंदिर पाडण्याबाबत ज्येष्ठ रंगकर्मी वामन केंद्रे यांनी ठणकावले. 

डॅनियल्स पुरस्काराला उत्तर देताना म्हणाले, ‘‘जगात कुठेही सादरीकरण करताना घाबरलो नाही. कारण पुण्यातील रसिकांचा मला अनुभव होता. येथील रसिक दर्जेदार असेल, तरच मनभरून कौतुक करतात.’