बारामती - महिलांमध्ये स्तनामध्ये होणा-या गाठींचे निदान अत्याधुनिक इलोस्टोग्राफी या सोनोग्राफी तंत्राद्वारेही होऊ शकते याचे प्रात्यक्षिकासह सादरीकरण बारामतीचे प्रसिध्द सोनोग्राफी तज्ज्ञ डॉ. सतीश पवार यांनी नुकतेच केले.

ओमानमधील मस्कत येथे नुकत्याच झालेल्या वर्ल्ड फेडरेशन ऑफ अल्ट्रासाऊंड इन मेडिसिन अँड बॉयॉलॉजी या जागतिक परिषदेत डॉ. सतीश पवार यांनी या नवीन विषयातील आपला शोधनिबंध सादर केला.

सीएनजीएम या स्तनात होणा-या गाठींचे निदान सोनोग्राफी तंत्रज्ञानाद्वारे होऊ शकते, ही बाब त्यांनी समोर आणली. बारामतीतील त्यांच्या सोनोग्राफी केंद्रात पंचवीसहून अधिक महिलांच्या अशा प्रकारच्या सोनोग्राफी रिपोर्टसचा अभ्यास केल्यानंतर इलोस्टोग्राफी या तंत्राद्वारे स्तनांमधील गाठींचे निदान करता येऊ शकते ही बाब समोर आली.

या तंत्राद्वारे असे निदान होऊ शकते ही बाब डॉ. सतीश पवार यांनी जागतिक स्तरावर प्रथमच समोर आणल्याने त्यांच्या या शोधनिबंधाचे जागतिक स्तरावर मस्कतमधील परिषदेत कौतुक केले गेले.

या संशोधनाच्या सादरीकरणात डॅा. सतीश पवार यांच्यासोबत डॅा. सम्राज्ञी पवार व डॅा. कीर्ती पवार यांचाही सहभाग होता.