पुणे : वादावादीतून ठेकेदाराने कामगाराला पहिल्या मजल्यावरुन फेकून दिल्याची घटना वडगाव खुर्द येथील एका बांधकाम प्रकल्पावर घडली. याप्रकरणी दोघांना सिंहगह पोलिसांनी अटक केली आहे. संजय मुरलीधर तुंबर (वय 46), रामचंद्र किसन वाघचौरे ( वय 36, रा.वाघोली), गोविंद पांडुरंग निंबाळकर (वय 47, रा. मानाजी बाग, बोपोडी) अशी अटक केलेल्यांची नावे आहेत.

मंतसीर हासीफ आलम (वय 21, रा.वडगाव खुर्द ) असे जखमी झालेल्याचे नाव आहे. पोलिसांनी दिलेल्या माहितीनुसार, फिर्यादी व त्याचे सहकारी वडगाव खुर्द येथील एका बांधकाम प्रकल्पावर काम करतात. शनिवारी दुपारी दोन वाजण्याच्या सुमारास त्यांचा सहकारी जुनेद यास बांधकाम प्रकल्पावरील काम आणि पगारामुळे झालेल्या वादातून संजय तुंबर, रामचंद्र वाघचौरे व गोविंद निंबाळकर असे तिघे मारहाण करीत होती. त्यावेळी फिर्यादी आलम यांनी मध्यस्थी करून तुम्ही आमच्या कामाबाबत आमच्या ठेकेदाराशी बोला, असे सांगितले.

त्याचा राग आल्याने आरोपींनी फिर्यादीस लाथा-बुक्‍क्‍यांनी मारहाण करत जिन्याने ओढत पहिल्या मजल्यावर नेले. तेथेही पुन्हा बेदम मारहाण करीत जीवे मारण्याच्या उद्देशाने त्यांना पहिल्या मजल्यावरुन खाली फेकून दिले. त्याचबरोबर जुनेदलाही जबर मारहाण केली. संबंधीत इमारतीच्या कामाचा ठेका आरोपींनी घेतला आहे. आलम हा ठेकेदारामार्फत तेथे काम करतो. याप्रकरणाचा तपास पोलिस उपनिरीक्षक दिपक खेडकर करीत आहेत.