भोसरी, ता. २४ ः भोसरीतील काही भागात महावितरणच्या विद्युत डीपींची झाकणे नाहिशी झाल्याने लहान मुले आणि भटक्या जनावरांच्या अपघाताचा धोका निर्माण झाला आहे. त्यामुळे उघड्या विद्युत डीपींना तातडीने झाकणे लावण्याची मागणी नागरिकांमधून होत आहे.
भोसरी गावठाणातील संत ज्ञानेश्वर भाजी मंडईतील विद्युत डीपीचे झाकण नाहीसे झाले आहे. या भाजीमंडईत मोठ्या प्रमाणात लहान मुलांचा वावर असतो. त्याचप्रमाणे टाकाऊ भाजीपाला खाण्यासाठी भटक्या जनावरांचाही येथे ठिय्या असतो. या मंडईच्या प्रवेशद्वाराजवळील विद्युत डीपीचे झाकण नाहीसे झाले आहे. त्याचप्रमाणे शांतीनगरमधील महात्मा फुले विद्यालयाजवळील ओढ्यालगत असणाऱ्या एका विद्युत डीपीचेही झाकण नाहीसे झाले आहे. अशीच परिस्थिती भोसरी गावठाणातील मारुती मंदिराजवळील विद्युत डीपीसह भोसरीतील इतर भागांतील विद्युत डीपीचीही झालेली दिसते.