पिंपरी : विधानसभेला दोन्ही कॉंग्रेस प्रत्येकी सव्वाशे जागा लढविणार असून ३८ जागा मित्रपक्षांना सोडणार असल्याचे माजी मुख्यमंत्री व कॉंग्रेसचे ज्येष्ठ नेते पृथ्वीराज चव्हाण यांनी रविवारी पिंपरीत सांगितले. दोन्ही पक्षांकडून पाच-सहा जागांची अदलाबदलही होऊ शकते,असे ते म्हणाले. दरम्यान, आपल्याला सुद्धा भाजपची ऑफर होती, पण ती सिरीअस नव्हती, असा गौप्यस्फोटही त्यांनी यावेळी केला.

पिंपरी-चिंचवडमधील दक्षिण कऱ्हाडचे (जि.सातारा) मूळ रहिवासी असलेल्यांच्या मेळाव्यासाठी चव्हाण आले होते. त्यातून ते उदयनराजे यांच्या राजीनाम्याने रिक्त झालेल्या सातारा लोकसभेच्या जागेवर पोटनिवडणुकीत उभे राहणार नसल्याचे पुन्हा स्पष्ट झाले. दक्षिण कऱ्हाडमधूनच पुन्हा विधानसभा लढणार असल्याचे त्यांनी स्पष्ट केले. या मेळाव्यानंतर ते  बोलत होते. यावेळी त्यांनी अवाच्या सव्वा जागांची मागणी हे वंचितचे परिपक्व राजकारणाचे लक्षण नाही, अशी खोचक टीका केली. मात्र,लोकसभेला वंचितचा मोठा फटका बसल्याचे त्यांनी मान्य केले. त्यामुळे विधानसभेला वंचितला आघाडीत घेण्याचे प्रयत्न सुरु आहेत, अशी माहिती त्यांनी दिली. त्यांच्याबरोबर शेवटच्या क्षणापर्यंत तोडगा काढण्याचा प्रयत्न करू, असे ते म्हणाले. 

पिंपरी-चिंचवडमधील तीनपैकी एक जागा कॉंग्रेस लढविणार असल्याचे त्यांनी सांगितले. मात्र,ती कोणती हे त्यांनी सांगितले नाही. त्यातून आघाडी असतानाचा २००९ चा पॅटर्नच शहरात राहणार असल्याचे स्पष्ट झाले आहे. तेव्हा चिंचवडची जागा कॉंग्रेस, तर भोसरी आणि पिंपरी राष्ट्रवादीने लढविली होती. कॉंग्रेस पराभूत होऊन दोन्ही ठिकाणी राष्ट्रवादी विजयी झाली होती.