पुणे : अल्पवयीन मुलीचे अपहरण करुन पुण्याला आल्यानंतर नगर रस्त्यावरील चंदननगर भागातून तेलंगणा पोलिसांच्या ताब्यातुन पलायन केलेल्या आरोपीचा चंदननगर पोलिसांना सोमवारी दुपारी अखेर खराडी भागात मृतदेह सापडला. चंदननगर पोलिसांकडून मागील चार दिवसांपासून आरोपीचा शोध घेतला जात होता. (Pune News)

जुबेर हाफिज शेख (वय २०, रा. मरकुंडा, जि. बिदर, कर्नाटक ) असे मृतावस्थेत सापडलेल्या आरोपीचे नाव आहे. शेख याच्या विरोधात अल्पवयीन मुलीचे अपहरण केल्याप्रकरणी तेलंगणा परिसरातील सरूरनगर पोलीस ठाण्यात गुन्हा दाखल करण्यात आला होता. तो चंदननगर भागात राहणाऱ्या त्यांच्यया बहिणीकडे वास्तव्यास असल्याची माहिती मिळाल्यानंतर  २० ऑगस्ट रोजी तेलंगणातील पोलिस उपनिरीक्षक बी. कृष्णय्या रामलू आणि पथकाने त्याला चंदननगर भागातून ताब्यात घेतले.

शेख आणि अल्पवयीन मुलीला कारमधुन घेऊन तेलंगणा येथे घेऊन पोलिसांचे पथक निघाले होते. वाटेत एका हॉटेलजवळ पोलिसांनी कार थांबविली. त्या वेळी तो बहिणीशी बोलण्याचा बहाणा करुन पोलिसांच्या ताब्यातून पसार झाला होता. या बाबतची माहिती चंदननगर पोलिसांना देण्यात आल्यानंतर त्याचा शोध घेण्यात आला.

दरम्यान, खराडी भागातील आयटी पार्कजवळ असलेल्या एका बंधाऱ्यातील पाण्यात एक युवक मृतावस्थेत सापडल्याची माहिती पोलिसांना मिळाली. चंदननगर पोलिसांनी अग्निशमन दलाच्या जवानांच्या मदतीने मृतदेह पाण्यातून बाहेर काढला. चौकशीत मृतदेह शेख याचा असल्याचे उघडकीस आले. पोलिसांनी याबाबतची माहिती तेलंगणा पोलिसांना दिली आहे. शेखने आत्महत्या केल्याचा संशय पोलिसांनी व्यक्त केला आहे.