पुणे - फायनान्स कंपनीने (Finance Company) अश्‍लील फोटो (Obscene Photos) व शिवीगाळ असलेले मेसेज (Message) व्हायरल केल्याने तरुणाने आत्महत्या (Youth Suicide) केल्याचा धक्कादायक प्रकार उघडकीस आला आहे. मेसेज व्हायरल करणारी फायनान्स कंपनी आणि त्यातील कर्मचाऱ्याविरोधात सिंहगड पोलिस ठाण्यात गुन्हा (Crime) दाखल करण्यात आला आहे.

अनुग्रह ए. पी. प्रकाशन (वय २२, रा. माणिकबाग, सिंहगड रस्ता, मुळ रा. केरळ) असे आत्महत्या केलेल्या तरुणाचे नाव आहे. याबाबत नाईजिल राजन मटानकोट (वय ३३, रा. आयटी रस्ता, औंध, मुळ रा. केरळ) यांनी फिर्याद दिली आहे. त्यानुसार आसान लोन कंपनी आणि तिच्या कर्मचाऱ्या विरोधात गुन्हा दाखल करण्यात आला आहे. २६ ते २७ जानेवारीदरम्यान सिंहगड रस्ता परिसरात हा प्रकार घडला. याबाबत पोलिसांनी दिलेल्या माहितीनुसार, फायनान्स कंपनीतून प्रकाशन यांना फोन आला व तुमच्या आईने आठ हजार रुपयांचे कर्ज घेतले आहे. त्याचे हप्ते भरण्यात आले नाही.

तसेच मुद्दल परत करण्यात आली नाही, असे सांगत त्यांच्याकडे पैशांची मागणी करण्यात आली. त्यानंतर फायनान्स कंपनीतील एका कर्मचाऱ्याने प्रकाशन यांचे अश्‍लील फोटो व शिवीगाळ असलेले मेसेज त्यांचे नातेवार्इक, मित्र आणि सहकारी यांना पाठवून व्हायरल केले. त्यामुळे बदनामी झाल्यामुळे प्रकाशन यांनी आत्महत्या केली. या गुन्ह्याचा तपास सिंहगड पोलिस ठाण्याचे सहायक पोलिस निरीक्षक प्रमोद वाघमारे करीत आहेत.