शिरोली : मालकाच्या सततच्या त्रासाला व धमक्‍यांना घाबरून तरुणाने आत्महत्या केल्याची घटना सायगाव (ता. खेड) येथे घडली. रामदास महादू खंडवे (वय 32, रा. तळ्याची ठाकरवाडी, सायगाव) असे या तरुणाचे नाव आहे. 

याबाबत त्याचा चुलतभाऊ पप्पू सहादू खंडवे यांनी खेड पोलिस ठाण्यात नवनाथ अशोक गायकवाड याच्याविरोधात फिर्याद दिली. त्यानुसार रामदास हा गायकवाड यांच्या वडगाव पाटोळे (ता. खेड) येथील फॅब्रिकेशन वर्कशॉपमध्ये वेल्डर म्हणून 2 वर्षांपासून काम करत होता. तेथे रामदास व गायकवाड यांच्यात कायम वाद होत होते. रामदास कामावर न आल्यास गायकवाड त्याला मारहाण व दमदाटी करत असे. "तू कामावर न आल्यास तुझी मुले घेऊन जाईल' अशी तो रामदास याला धमकी द्यायचा. तो त्याला वेळेवर पगार देत नसे. त्यामुळे रामदास कायम तणावात असे.

15 नोव्हेंबर रोजी रामदास दुपारीच कामावरून घरी आला तेव्हा गायकवाड याने पुन्हा घरी येऊन त्यास मारहाण व शिवीगाळ केली. त्यानंतर 17 नोव्हेंबर रोजी सकाळी कामावर गेलेला रामदास घरी परतला नाही. त्याचा शोध घेतल्यानंतर सोमवारी (ता. 18) रात्री त्याच्या राहत्या घरी पडवीमध्ये लाकडी वाशाला गळफास घेतलेल्या अवस्थेत आढळला. मृत्यूपूर्वी "मालकामुळे मी आत्महत्या करीत आहे' असे रामदासने पडवीमध्ये असलेल्या काचेवर लिहून ठेवले होते.

रामदास याच्या मागे आई, वडील, पत्नी व दोन मुले आहेत. सहायक पोलिस निरीक्षक नीलेश बडाख तपास करीत आहेत.