पुणे - शहरात खासगी बसच्या प्रवाशांची रोजची संख्या ६४  हजारांपेक्षा जास्त असली, तरी या बसना  पिकअप पॉइंट नाहीत. त्यामुळे प्रवासी घेण्या-सोडण्यासाठी त्या रस्त्यावरच उभ्या राहतात. परिणामी, त्याचा वाहतुकीला अडथळा होऊन कोंडीत भर पडत आहे.

स्थानकासाठी जागा आणि प्रवाशांची चढ-उतार करण्यासाठी पिकअप पॉइंट्‌स मिळावेत, ही खासगी बसमालक-चालकांची अनेक दिवसांपासूनची मागणी आहे.

राज्य सरकारने याबाबत अध्यादेश काढून महापालिकांना आदेशही दिले आहेत; परंतु अद्याप कार्यवाही झालेली नाही. जकात रद्द झाल्यावर चारही दिशांच्या जकात नाक्‍यांच्या जागा भाडेतत्त्वावर मिळाव्यात, अशी मागणी त्यांनी महापालिकेकडे केली होती. वाहतूक पोलिस आणि आरटीओच्या अधिकाऱ्यांनी पाहणीही केली; परंतु त्यावर महापालिकेत निर्णय झाला नाही. त्यामुळे व्यावसायिकांनी स्वारगेट, संगमवाडी येथे खासगी जागा भाडेतत्त्वावर घेतल्या आहेत. त्यातून त्यांच्या बस मार्गावर धावत आहेत. परंतु, रस्त्यावर पिकअपसाठी त्यांना अद्याप जागा मिळालेल्या नाहीत.

या मार्गांवर होते वाहतूक
नागपूर, नाशिक, कोल्हापूर, सातारा, सांगली, सोलापूर, चंद्रपूर, अमरावती, अकोला, जळगाव, धुळे, नांदेड, औरंगाबाद, लातूर, उस्मानाबाद, रत्नागिरी, सिंधुदुर्ग आदी मार्ग. 

शहरातून रोजच्या बस १६००
रोजचे प्रवासी ६४ हजार

राजाबहादूर मोतीलाल मिल रस्ता, भैरोबानाला चौक, कात्रजमधील राजीव गांधी उद्यान आणि वाकडेवाडीतील जमनालाल बजाज पुतळा आदी ठिकाणी बस व्यावसायिकांनी पिकअप पॉइंट्‌स मागितले होते. तसेच, स्थानकासाठी जागा मागत आहोत. त्यासाठी व्यावसायिक भाडेही भरायला तयार आहोत. परंतु, कार्यवाही होत नाही.  
- बाळासाहेब खेडेकर, अध्यक्ष, पुणे डिस्ट्रिक्‍ट लक्‍झरी बस असोसिएशन 

वाहतूक पोलिस, आरटीओ आणि महापालिकेच्या अधिकाऱ्यांसमवेत लवकरच याबाबत संयुक्त पाहणी होणार आहे. त्यानंतर बस व्यावसायिकांना पिकअप पॉइंट्‌ससाठी जागा कोठे उपलब्ध करून देता येईल, याचे नियोजन करण्यात येईल.  ही प्रक्रिया येत्या १५ दिवसांत सुरू होईल.
- माधव जगताप, उपायुक्त, अतिक्रमण विभागप्रमुख, महापालिका