पुणे - हिंदू देवतांबद्दल आक्षेपार्ह वक्तव्य केल्याप्रकरणी सिंबायोसिस कॉलेज ऑफ आर्ट्स ॲण्ड कॉमर्समधील प्रा. अशोक सोपान ढोले (वय ४३, रा. सिंहगड रस्ता) यांच्याविरुध्द डेक्कन पोलिस ठाण्यात गुन्हा दाखल केला आहे. तसेच, महाविद्यालयाकडून प्रा. ढोले यांच्यावर निलंबनाची कारवाई करण्यात आली आहे.

प्रा. ढोले यांनी हिंदू देवतांबद्दल आक्षेपार्ह वक्तव्य करून विद्यार्थ्यांमध्ये द्वेष भावना पसरविण्याचा प्रयत्न केल्याचा आरोप करत अखिल भारतीय विद्यार्थी परिषदेच्या कार्यकर्त्यांनी गुरुवारी महाविद्यालयासमोर आंदोलन करत निषेध नोंदविला. तसेच, या प्राध्यापकास निलंबित करून गुन्हा दाखल करण्याची मागणी केली.

परिषदेचे पश्चिम महाराष्ट्र प्रदेश मंत्री अनिल ठोंबरे म्हणाले, ‘‘पुण्यात विविध ठिकाणांहून विद्यार्थी शिक्षणासाठी येतात. शिक्षणाच्या पवित्र क्षेत्रात ढोले यांच्यासारखे प्राध्यापक विद्यार्थ्यांची दिशाभूल करण्याचे प्रयत्न करतात, हे मुळीच सहन केले जाणार नाही.’’ दरम्यान, ‘‘ढोले यांचे निलंबन केले असून, सरकारी नियमानुसार कार्यवाहीची प्रक्रिया सुरू केली आहे,’’ अशी माहिती प्राचार्य डॉ. ऋषीकेश सोमण यांनी दिली.

डेक्कन पोलिसांकडून गुन्हा दाखल -

प्रा. ढोले यांच्याविरुध्द गुन्हा दाखल करावा, या मागणीसाठी हिंदुत्ववादी संघटनांच्या कार्यकर्त्यांनी बुधवारी रात्री डेक्कन पोलिस ठाण्यासमोर आंदोलन केले. या वेळी गुन्हे शाखेचे पोलिस उपायुक्त अमोल झेंडे आणि परिमंडळ एकचे पोलिस उपायुक्त संदीपसिंग गिल यांनी पोलिस ठाण्यात येऊन कार्यकर्त्यांशी चर्चा केली. हे आंदोलन गुरुवारी पहाटेपर्यंत सुरू होते.

या संदर्भात रवींद्र दिलीप पडवळ (रा. वडकी गाव, ता. हवेली) यांनी फिर्याद दिली आहे. त्यावरून प्रा. ढोले यांच्याविरुध्द गुन्हा दाखल केल्याची माहिती डेक्कन पोलिस ठाण्याचे वरिष्ठ निरीक्षक विपिन हसबनीस यांनी दिली.