पुणे : सावित्रीबाई फुले पुणे विद्यापीठातील 'कमवा आणि शिका' योजनेत आर्थिक गैरव्यवहार झाल्याची कबुली उच्च व तंत्र शिक्षण राज्यमंत्री रवींद्र वायकर यांनी सोमवारी विधानसभेत केली. याप्रकरणात दोषींवर फौजदारी गुन्हा दाखल करण्यात येईल, असे आश्वासनही त्यांनी यावेळी दिले.

पुणे विद्यापीठातील विद्यार्थ्यांना काही तास काम केल्यानंतर त्यांच्या बँकखात्यात मानधन जमा केले जाते पण, गेल्या काही वर्षापासून विद्यापीठात बोगस विद्यार्थी दाखवून मानधनाची रक्कम घेण्याचा प्रकार सुरू आहे. यासंदर्भात आमदार विजय काळे आणि भीमराव तापकीर यांनी लेखी प्रश्न विचारला होता. प्रश्न उत्तराच्या तासामध्ये चर्चेला हा प्रश्न आला, त्यावेळी वायकर यांनी ही कबुली दिली. 

याप्रकरणाची विद्यापीठाचे माजी कुलगुरू डॉ. अरूण अडसूळ यांच्या अध्यक्षतेखाली समिती स्थापन केली असून चौकशी सुरु असल्याचेही त्यांनी निदर्शनास आणून दिले. त्यावर काही सदस्यांनी 'गैरप्रकार झाला असेल, तर चौकशी कसली करता, कारवाई काय करणार ते सांगा,' असा आग्रह धरला. तेव्हा सदस्यांची मागणी मान्य करित राज्यमंत्री वायकर यांनी याप्रकरणात दोषींवर फौजदारी गुन्हा दाखल करण्यात येईल,अशी घोषणा केली.