पुणे - प्रेषित मोहम्मद पैगंबर यांच्याविषयी आक्षेपार्ह ट्विट केल्याप्रकरणी भारतीय जनता पक्षाने हकालपट्टी केलेल्या माध्यम प्रभारी नवीनकुमार जिंदाल यांच्याविरुद्ध कोंढवा पोलिस ठाण्यात गुन्हा दाखल करण्यात आला आहे.

झाकीर इलियास शेख (वय ३०, रा. मिठानगर, कोंढवा खुर्द) यांनी याप्रकरणी फिर्याद दिली आहे. पोलिसांनी दिलेल्या माहितीनुसार, जिंदाल हे भाजपचे दिल्लीतील माध्यम प्रभारी म्हणून काम पाहत असताना त्यांनी एक जून रोजी आक्षेपार्ह ट्विट केले होते. त्यावरून एका विशिष्ट धर्मीयांच्या भावना दुखावल्या. त्यांच्या या ट्विटनंतर देश-परदेशातून आणि आंतरराष्ट्रीय पातळीवर हि तीव्र प्रतिक्रिया उमटल्या होत्या.

त्यामुळे पक्षाच्या धोरणाचे उल्लंघन केल्याचा ठपका ठेवत भाजपने जिंदाल यांचे प्राथमिक सदस्यत्व रद्द करत त्यांची पक्षातून हकालपट्टी केली आहे. याप्रकरणी शेख यांनी कोंढवा पोलिस ठाण्यात फिर्याद दिली. त्यावरून जिंदाल यांच्याविरुद्ध राष्ट्रीय एकात्मतेला बाधा पोहोचविणे, धार्मिक भावना दुखावणे अशा कलमांनुसार गुन्हा दाखल झाला आहे.