थेऊर, ता. ११ : हवेली तालुक्यातील वारकरी संप्रदायाचा वैभवशाली वारसा जपणारा आणि डोळ्यांचे पारणे फेडणारा ‘वासंतिक चंदनउटी मोगरा आरास वारकरी भजन व संमेलन’ सोहळा शुक्रवारी (ता. १५) थेऊर येथे होणार आहे. या सोहळ्यात हवेली तालुक्यातील ७१ गावांतील भजनी मंडळे, कीर्तनकार आणि वारकरी सहभागी होणार आहेत अशी माहिती अखिल भारतीय वारकरी मंडळाचे उपाध्यक्ष आनंद तांबे यांनी दिली.
थेऊर येथील म्हातारी माता मंदिर येथे शुक्रवारी (ता. १५) दुपारी ४ ते रात्री ९ या वेळेत कार्यक्रमाचे आयोजन करण्यात आले आहे. उन्हाळ्याच्या दिवसात पांडुरंगाला शीतलता मिळावी या श्रद्धेने चंदनउटी आणि मोगऱ्याची आकर्षक आरास केली जाते. यावेळी हवेली तालुक्यातील ७१ गावांतील पाचशेहून अधिक टाळकरी एकाच वेळी अभंगवाणी सादर करणार आहेत. तसेच पुरुष आणि महिला भजनी मंडळांचा एकत्रित सहभाग आणि टाळ गजर असणार आहे.