पुणे ः भाजपचे प्रदेशाध्यक्ष चंद्रशेखर बावनकुळे यांनी शनिवारी पुणे, बारामती, शिरूर व मावळ या चार ही लोकसभा मतदारसंघाच्या निवडणुकीच्या तयारीचा आढावा घेतला. चारही मतदारसंघाच्या उमेदवारांसह प्रमुख पदाधिकाऱ्यांशी त्यांनी संवाद साधला. बावनकुळे यांनी रात्री उशिरापर्यंत बैठक प्रचाराची माहिती घेत उमेदवारांना मार्गदर्शनही केले.

बावनकुळे शनिवारी पुणे दौऱ्यावर होते. त्यांनी दिवसभर पक्षाच्या विविध कार्यक्रमांना हजेरी लावली. त्यानंतर सायंकाळी त्यांची पक्षाच्या एरंडवणे येथील कार्यालयात लोकसभा उमेदवारांच्या कोअर कमिटीसमवेत बैठक झाली. यावेळी भाजपचे पुण्याचे उमेदवार मुरलीधर मोहोळ, बारामती लोकसभा मतदारसंघाच्या राष्ट्रवादी कॉंग्रेस पक्षाच्या उमेदवार सुनेत्रा पवार, मावळ मतदारसंघातील शिवसेनेचे उमेदवार श्रीरंग बारणे व शिरूर लोकसभा मतदारसंघाचे राष्ट्रवादी कॉंग्रेस पक्षाचे उमेदवार शिवाजीराव आढळराव पाटील यांची या बैठकीस उपस्थिती होती.

प्रारंभी शिरूर, मावळ, त्यानंतर बारामती व शेवटी पुणे लोकसभा मतदारसंघाची बैठक घेतली. यावेळी त्यांनी लोकसभेचे उमेदवार, लोकसभा उमेदवार कोअर कमिटी, प्रमुख पदाधिकारी यांच्याशी त्यांनी संवाद साधला. प्रमुख पदाधिकारी, कोअर कमिटीमधील 15 जणांकडून प्रचाराची तयारी कशा पद्धतीने करण्यात येत आहे. प्रचाराला मतदारांकडून कसा प्रतिसाद मिळत आहे, कोणत्या भागामध्ये प्रचाराला गती द्यावी लागेल, कार्यकर्त्यांना काय अडचणी येत आहेत, उमेदवारांनी वैयक्तीक पातळीवर मतदारांशी संपर्क साधण्यासाठी काय उपाययोजना केल्या आहेत, याबाबतची माहिती बावनकुळे यांनी घेतली.