मंचर - छत्रपती शिवाजी महाराज शिवजयंती सोहळा सोमवारी (ता. १९)रोजी आहे. त्यानिमित्ताने गावोगावी शिवजयंती उत्सवाची तयारी जोरात सुरु आहे. या पार्श्वभूमीवर मंचर (ता.आंबेगाव) येथे छत्रपती शिवाजी महाराज यांचे तयार असलेले विविध उंचीचे पुतळे खरेदीसाठी शिवभक्तांची वर्दळ वाढली आहे. 'जय शिवाजी, जय भवानी' असा जल्लोष करत युवक व ज्येष्ठ नागरिक पुतळे खरेदी करत आहेत.

आंबेगाव-जुन्नर भागामध्ये शिवरायांचा सहवास होता. आंबेगाव तालुक्यात श्रीक्षेत्र वडगाव काशिंबे येथे भरणाऱ्या घोड्यांच्या बाजारातून छत्रपतींनी घोडे खरेदी केल्याच्या नोंदी आहेत. तसेच मंचर, घोडेगाव शहरासह जवळपास आंबेगाव तालुक्यातील १०३ गावांमध्ये शिवजयंती उत्सव मोठ्या थाटामाटात साजरा केला जातो. आपल्याही घरी शिवाजी महाराजांचा पुतळा असावा या भावनेने पुतळा खरेदी करण्याकडे युवकांचा कल वाढलेला आहे.

येथे विविध उंचीचे अर्ध्या फुटापासून अडीच फुटापर्यंतचे शिवाजी महाराजांचे पुतळे खरेदीसाठी नागरिकांची गर्दी वाढत आहे .शंभर रुपयांपासून सातशे रुपये किमतीचे पुतळे येथे विक्रीसाठी राजस्थान येथील धर्मेंद्र राठोड या कारागिराने उपलब्ध करून दिले आहेत

अवसरी खुर्द येथील मिलिंद खुडे, मंचर येथील भाऊसाहेब निघोट, तांबडे मळा येथील विठ्ठल तांबडे, चांडोली बुद्रुक येथील अर्जुन थोरात, आदर्श गाव गावडेवाडी येथील सेवानिवृत्त ग्रामविकास अधिकारी मनोहर थिटे, ऋषिकेश गावडे आदी मान्यवरांची छत्रपती शिवाजी महाराज यांचा पुतळा घेण्यासाठी लगबग सुरू होती.

'खेड तालुक्यातील3 कुरळी येथे छत्रपती शिवाजी महाराजांच्या सह अन्य महापुरुष, विविध देवतांच्या मूर्ती तयार केल्या जातात. राजस्थान भागातील कारागीर आहेत. पुतळे तयार करताना व विक्री करताना सर्व पावित्र्य राखले जाते. गेल्या तीन दिवसात अनेकांनी छत्रपती शिवाजी महाराज यांचे विविध आकारातील पुतळे खरेदी केले आहेत.अजुन चार-पाच दिवस येथे पुतळे विक्रीसाठी उपलब्ध राहणार आहेत.खरेदीला शिवभक्तांचा चांगला प्रतिसाद आहे.'

- धर्मेंद्र राठोड, कारागीर