स्वातंत्र्याच्या अमृत महोत्सवाच्या दिवशी पुण्यात चक्क पंतप्रधान नरेंद्र मोदी यांच्या मंदिराची उभारणी करण्यात आली आहे. पुण्यातील औंध गावात पंतप्रधान नरेंद्र मोदी यांच्या मंदिराची स्थापना केली आहे. या मंदिरात मोदी यांचा अर्धाकृती पुतळा उभारण्यात आला आहे. मोदींच्या कार्यावर आधारित काव्याची रचना करून तीही येथे मोठ्या फलकावर झळकावण्यात आली आहे. मोदींचे हे पुण्यातील पहिलेच मंदिर असून, देशपातळीवरही या प्रकारचे पहिलेच मंदिर असल्याचा दावा केला जातोय.

मोदी यांचं मंदिर उभारणाऱ्या भाजप कार्यकर्त्याचं नाव मयूर मुंडे असं आहे. त्यांनी स्वतःची मालकी असलेल्या जागेत मोदी यांचं मंदिर उभारले आहे. मंदिरावरून ट्रोल केलं गेलं तरी चालेल पण मोदींकडून आपल्याला प्रेरणा मिळते त्यासाठी मंदीर उभारल्याची प्रतिक्रिया मयूर मुंडे यांनी दिली.

औंध येथील ॲड. मधुकर मुसळे यांच्या संकल्पनेतून मोदी यांचं मंदिर उभारण्यात आलं. दिवानशु यांनी हा पुतळा तयार केला असून यासाठी एक लाख 60 हजार रुपये खर्च झाले आहे. 15 ऑगस्ट 2021 रोजी औंधमधील ज्येष्ठ नागरिक के. के. नायडू यांच्या हस्ते मंदिराचे उद्घाटन करण्यात आले. मंदिरासमोर मयूर मुंडे यांनी पंतप्रधान मोदी यांच्या कार्यावर रचलेली कविता ‘मोदी भक्तां’साठी लावण्यात आली आहे. मंदिराबाहेर असलेल्या फलकावर आतापर्यंत मोदींनी केलेल्या कामाचा उल्लेख कवितेच्या आधारे ही मांडला आहे.