ओतूर : खिरेश्वर ता.जुन्नर व किल्ले हरिश्चंद्रगडाच्या पायथ्याशी असलेली विविध पर्यटन स्थळे अडराई, काळु धबधबा, प्राचीन नागेश्वर मंदिर, पिंपळगाव जोगा धरण क्षेत्र येथे पर्यटक, ट्रेकर्स, निसर्गा अभ्यासक हे मोठ्या संख्येने पावसाळ्यात फिरायला व ट्रेकिंग साठी येत असतात. या कालावधीत सदर पर्यटन स्थळी अनुचित प्रकार घडू नये, वनसंपदा सुरक्षित रहावी तसेच सुरक्षित व जबाबदार पर्यटन होऊन खिरेश्वर गावचा पर्यटनाच्या माध्यमातून शाश्वत विकास व्हावा या उद्देशाने जुन्नर वनविभागाच्या वतीने शुुुक्रवारी ता.१२ जुुुलैल रोजी खिरेश्वर येथे खुबी बंधारावर वनविभाग जुन्नर व संयुक्त वनव्यवस्थापन समिती खिरेश्वर यांच्या मार्फत पर्यावरण शुल्क नाका सुरू करण्यात आला आहे.

जुन्नरचे उपवनसंरक्षक अमोल सातपुते यांच्या संकल्पनेतून सहाय्यक वनसंरक्षक अमित भिसे, ओतूरचे वनपरिक्षेत्र अधिकारी वैभव काकडे यांच्या उपस्थित हा पर्यावरण शुल्क नाका सुरू करण्यात आला. याप्रसंगी संयुक्त वन व्यवस्थापन समिती खिरेश्वरचे अध्यक्ष देवराम मेमाने,खिरेश्वर सरपंच विजय काठे, उपसरपंच कुसुम कवठे, पोलीस पाटील अभिजित भोरले, वनपाल आर.डि.गवांदे, वनरक्षक कोमल डाखोरे , वनरक्षक आर.के.फुलवड तसेच वन कर्मचारी,ग्रामपंचायत सदस्य व ग्रामस्थ मोठ्या संख्येने उपस्थित होते.