पुणे : मासिक पाळी दरम्यान सॅनिटरी पॅड वापरण्याबाबत जागृती झाली. परंतू त्याची विल्हेवाट लावण्याची नवी समस्या उभी राहिली. देशभरात 100 टक्के स्त्रिया पॅड वापरत नाहीत. तरीही त्याच्या विघटनाचा मोठा प्रश्न उभा राहिला आहे. सॅनिटरी पॅडची घरच्या घरी विल्हेवाट लावण्यासाठी ग्रीन अर्थ इक्विपमेंटचे रविंद्र गद्रे यांनी दाहिनी हे यंत्र निर्माण केली. प्रत्येक घरात किंवा इमारतीच्या प्रत्येक मजल्यावर हे यंत्र लावणं सोयीचं होईल.

देशभरात 9 हजार टन सॅनिटरी पॅडचा कचरा साचतो. पण एक पॅड नष्ट करण्यासाठी शेकडो वर्षे लागतात. विल्हेवाटाची शास्त्रीय आणि पुरेशी यंत्रणा नव्हती. परंतू दाहिनीमुळे ती विल्हेवाट लावणं सोपं झाले आहे. दाहिनी या यंत्रावर रविंद्र गद्रे यांच्या सहकारी सायली पोंक्षे आणि गौतमी भोर यांनी शोधनिबंध सादर केला. इटलीमधील रोम इंटरनॅशनल कॉन्फरन्स ऑफ सस्टेनेबल डेव्हलपमेंटमध्ये हा शोधनिबंध सादर केला गेला. कचऱ्यामधून सॅनिटरी पॅड माणसांद्वारेच बाहेर काढले जाते. त्यामुळे आरोग्याचा प्रश्नही उभा राहतो.

दाहिनीमध्ये सॅनिटरी पॅड टाकल्यानंतर 15 मिनिटांमध्ये त्याची राख होते. ती राख झाडांना खत म्हणूनही वापरता येते. त्याबरोबरच त्यामधून बाहेर पडणारा कार्बनडायऑक्साईड अत्यल्प प्रमाणात असतो. त्यामुळे हे यंत्र पर्यावरणपूरक आहे. सॅनिटरी कचऱ्यानंतर हॉस्पिटलमधील कचऱ्याबाबत काम करण्याचा त्यांचा मानस आहे.