पुणे : रात्रभर प्रवास करून घरी येताच त्यांना समोर दिसले ते आपल्या दोन सख्या भावांचे मृतदेह. गाढ झोपेतच अंगावर भिंत कोसळल्याने अक्षरशः चेंगरलेले मृतदेह पाहून बहीण आणि भावाच्या पायाखालची जमीन सरकली. या दुर्घटनेतील दोन सख्या भावांच्या मृत्यूने ससून रुग्णालयाच्या शवगाराचा परिसर शोकाकूल झाला होता. 

रावते कुटुंब गेल्या काही महिन्यांपासून पुण्यात विविध ठिकाणी बांधकामांची कामे करतात. प्रल्हाद, चंदन, मीना आणि अरुण हे चारही बहीण-भाऊ शहरातील वेगवेगळ्या बांधकामाच्या ठिकाणी काम करत होते. त्यातील प्रल्हाद चंदन रावते (वय 30, रा. मध्य प्रदेश) आणि जितू चंदन रावते (वय 23) या दोन सख्या भावांचा या दुर्घटनेत मृत्यू झाला. मीना आणि अरुण हे शेतीच्या कामासाठी मध्य प्रदेशातील त्यांच्या गावाकडे शनिवारी (ता. 29) रात्री पुण्यातून गेले होते. ते तेथील काम करून सोमवारी रात्री परत पुण्याकडे येण्यासाठी ट्रेनमध्ये बसले. त्यापूर्वी त्यांचे प्रल्हाद आणि जितू यांच्याबरोबर फोनवरून बोलणे झाले होते. त्यांची ट्रेन आज सकाळी पुण्यात पोचली. ते दोघे आंबेगाव येथे राहात असलेल्या घरी आले. मात्र, तेथे त्यांना प्रल्हाद आणि जितू या आपल्या सख्या भावांचे मृतदेह दिसले, अशी माहिती त्यांचा मावसभाऊ दीपक ठाकरे यांनी दिली. 

मिना आणि अरुण हे देखिल याच झोपड्यांमध्ये राहतात. पण, ते गावाकडे गेल्याने या दुर्घटनेतून ते बचावले, असेही त्यांनी सांगितले.