राष्ट्रवादी काँग्रेसमध्ये अजित पवारांच्या बंडानंतर घडामोडींना वेग आला आहे. यादरम्यान अजित पवारांसोबत मंत्रिपदाची शपथ घेतलेले नेते छगन भुजबळ यांनी फोनवरून जीवे मारण्याची धमकी देण्यात आल्याचा प्रकार समोर आला आहे. या प्रकरणी पुणे पोलिसांनी कोल्हापूर जिल्ह्यातील चंदगड येथील एका तरुणाला पुणे पोलिसांनी महाड (जि. रायगड) येथून अटक केली आहे. आता या धमकीच्या फोन काँलचे रेकॉर्डिंग देखील आता समोर आले आहे.

छगन भुजबळ पुण्यात दौऱ्यावर असताना हा धमकीचा फोन आल्यानंतर पुणे पोलिसांच्या गुन्हे शाखेने आणि कोरेगाव पार्क पोलिसांनी तातडीने हालचाली करत मोबाईल क्रमांकाच्या लोकेशनवरून त्या तरुणाला महाड येथून ताब्यात घेतले. संबंधित तरुणाने मद्यधुंद अवस्थेत धमकीचा फोन केल्याची प्राथमिक माहिती पोलिसांनी दिली.

पोलिस आयुक्त रितेश कुमार, पोलिस सहआयुक्त संदीप कर्णिक, अतिरिक्त आयुक्त रामनाथ पोकळे, परिमंडळ दोनच्या पोलिस उपायुक्त स्मार्तना पाटील, गुन्हे शाखेचे पोलिस उपायुक्त अमोल झेंडे, सहायक आयुक्त सुनील तांबे आणि सहायक आयुक्त सतीश गोवेकर यांच्या मार्गदर्शनाखाली गुन्हे शाखा आणि कोरेगाव पार्क पोलिसांच्या पथकाने ही कारवाई केली.

ऑडिओ क्लिप मध्ये काय आहे..

भुजबळांच्या ऑफिसमध्ये फोन लागला आहे का फोन असं आरोपीनं विचारलं. त्यानंतर, भुजबळांना मारायची सुपारी मिळालीय. मी प्रशांत पाटील बोलतोय. मला त्यांना मारायची सुपारी मिळालीय, त्यांना उद्या मी मारणार आपण सांगून काम करतो म्हणून तुम्हाला सांगतोय. सुपारी कोणी दिली असं विचारलं असता, दिली अशीच कोणीतरी असंही त्याने सांगितलं.

साहेबांनी काय वाईट केलंय तुमचं? त्यांना का मारणार असं विचारलं असता, काय वाईट केलंय ते साहेबांना माहिती असं उत्तर आरोपीनं दिलं. मी सांगून काम करतो म्हणून सांगायचं काम केलं. ठेवा आता, म्हणत त्याने फोन ठेवून दिला. आता पुणे पोलिसांनी प्रशांत याला अटक केली असून अधिकचा तपास सुरू केला आहे.

हा तरुण मूळचा कोल्हापूर जिल्ह्यातील असून सोमवारी रात्री त्याने हा कॉल केला होता. त्यानंतर कोरेगाव पार्क पोलिस आणि गुन्हे शाखा यांनी संयुक्त कारवाई करत त्याला महाड येथून ताब्यात घेतले आहे. पुढील तपास सुरू आहे.

- स्मार्तना पाटील, पोलिस उपायुक्त, परिमंडळ २.